د پکتيا د والي وياند نقيب احمد اتل رسنیو ته وویل، چې امنیتي ځواکونو د لارې خلاصون پر مهال وسله وال مخالفین ځپلي دي.
اتل زیاته کړه، چې په تېرو دوو ورځو کې د هوايي بريدونو تر څنګ په ځمکنيو عملياتو کې له طالبانو شاوخوا سيمې نیول شوي او ۹ وسله وال وژل شوي.
هغه وايي، چې د احمدخېلو او ميرزکې ولسوالۍ اړوند سيمې د افغان ځواکونو په ولکه کې دي او کوم پلونه، پلچکونه چې ويجاړ شوي د هغوی د رغولو چارې هم پیل شوي دي.
د پکتيا د امنيه قوماندانۍ د امنيت امر سمنوال محمد ايوب رسنيو ته وويل، د لارې له بنديدو سره سم په پنځو ولسواليو کې د وسله والو طالبانو پر ضد عمليات پيل شوي، چې پر وینا يې د ملکي مرګ ژوبلې مخنیوي له پاره عمليات په کرار، کرار پرمخ ځي.
د لارې د خلاصون پر مهال مسافرو له دولت او وسله والو وغوښتل، چې په لويو لارو کې خلک و نه ځوروي.
بلال منګل چې له پټان ولسوالۍ د مرکز ګردېز پر لوري روان و سلام وطندار سره په خبرو کې وويل، چې تر ډېره د وسله والو طالبانو او دولت تر منځ جګړو کې ولسي وګړي قرباني ورکوي.
یاده دې وي، چې وسله والو طالبانو د مرکز ګردېز او پټان ولسوالۍ لويه لاره دوه ورځې وړاندې په میرزکې سیمه کې د خلکو په مخ تړلې وه، چې ورسره د پنځو نورو ولسوالیو لارې هم بندې شوې وې.
