اوتگن کیچه پروان ولایتی‌نینگ بگرام تومنی رباط قیشلاغیده 222 قطعه پولیس کوچلری تامانیدن یولگه قوییلگن عملیات نتیجه سیده، 65 یاشر بیر عیال هلاک و ایکی یاش ییگیت قولگه آلینگن.
اوشبو واقعه‌دن سونگ، بوگون مذکور قیشلاق یشاوچیلریدن یوزلرچه‌سی چاریکار شهری‌نینگ مقاومت تورت یولیده ناراضیلیککه قول اوریب و قولگه آلینگن‌لر قوییب یوباریلیشی‌نی سوره‌گن‌لر.
اوتگن کیچه پولیس کوچلری تامانیدن قولگه آلینگن یاشلر متین و بختیارنینگ آته‌سی میرملک نینگ ایتیشیچه، اوغیل‌لری خصوصی بیر شرکت‌ده ایش قیله‌دیلر و بولر هیچ بیر حزب یا-ده تشکیلات بیلن باغلیق ایمس دیر.
اعتراضچیلر عملیات امنیتی کوچلر تامانیدن اختیاری شکلده عمل‌گه آشیریلگن دیب ایتیشیچه، پولیس کوچلری رسمی رخصت آلمه‌ی و عدلی و قضایی اداره‌لری حضور سیزلیگی‌ده رباط قیشلاغی‌نینگ مذکور یشاوچیسی‌نی اویی‌گه عملیات اویوشتیرگن.
عین حالده، اعتراضچیلر کابل-شمال قتناو یولی‌نی ترافیک یوزیگه یاپیب ایتیشیچه، اولرنینگ ایستک‌لریگه قانیقرلی جواب بیریلگونگه‌قدر، بو قتناو آچیلمه‌یدی.
عین حالده، پروان محلی حکومتی، ناراضلیک نماییشی باشلنگنیدن یریم ساعت اوتگنیدن سونگ، ولایتی کینگش اعضاسی غلام بهاوالدین جیلانی‌نی محلی حکومت نیابتیده ناراضچیلرنینگ ایستک‌لرینی بیلیش اوچون محل‌گه یوبارگن.
جناب جیلانی ناراضچیلر بیلن اوچره‌شیب ایتیشیچه، قولگه آلینگن کیشیلر بوگون شام گچه قوییب یوباریله‌دی و اوشبو موضوع پروان محلی حکومتی و ایچکی ایشلر وزیرلیگی تامانیدن تیکشیریله‌دی.
عین حالده، پروان ولایت کینگشی اعضاسی، ناراضچیلردن سوزلشوو اوچون نماینده‌لرینی ولایت مقامی گه یوباریب و قتناو یول نی ترافیک یوزیگه آچیش‌لرینی سوره‌گن. بیراق ناراضچیلر بو ایستک‌که رد جواب بیریب ناراضیلیک‌لریگه دوام بیرگن.
آتی فاش ایتیلیشی‌نی ایستمه‌گن بیرمنبع نینگ سلام‌وطندارگه ایتیشیچه، مذکور عملیات پروان امنیتی اداره‌لری‌نینگ اویغونسیزلیگی عمل گه آشیریلگن. عملیات نتیجه‌سیده بیرعایله‌نینگ ایکی عضاسی قولگه آلینیب، 4 میل کلاشینکوف و ایکی میل تفنگچه امنیتی کوچلرنینگ قولیگه توشکن.
