جاپان په کابل کې د کډوالو له نړیوالې ادارې یا IOM سره ۹ میلیونه ډالره مرسته وکړه.
په کابل کې د جاپان سفارت شاژدافیر تاکاهاشي یوشیاکي نن په کابل کې د دغه هوکړهلیک د لاسلیک پر مهال وویل، دا پیسې به د طبیعي پېښو له کبله د رامنځته کېدونکیو ګواښونو د کموالي، د اوبو رسونې سېسټم د جوړولو، عامه پوهاوي، د زېربناوو جوړولو، د اوبو د سرچینو مدیریت او د سېلابونو د مخنیوي په برخه کې ولګول شوي.
نوموړی وايي، افغانستان د وچکالۍ، زلزلې او ځمکې ښویېدنې په برخه کې له ګواښ سره د مخ هېوادونو له ډلې یو دی چې هر کال د زرګونو کسانو ژوند له ګواښ سره مخ کوي.
د کډوالۍ نړیوال ادارې مسووله فاطمه نصرت غزلي وايي، ټاکل شوې یادې پیسې په ۲۰ ولایتونو کې د طبیعي پېښو له کبله پر ۵۷ زیانمنو سیمو او په راتلونکیو درېوو کلونو کې پر ۳۵۰ زره زیانمنو ولګېږي.
طبیعي پېښو ته د رسېدو په چارو کې د دولت وزیر نجیباقا فهیم وايي، د دې پروژې په پلي کولو سره به د طبیعي پېښو له کبله شته ګواښونه کم او ظرفیت به لوړ شي.
د ملګرو ملتونو د راپورونو له مخې، هر کال ۲۵۰ زره افغانان د طبیعي پېښو له ګواښ سره مخ کېږي.