په کابل کې د سیاسي چارو شنونکی احمد سعیدي د ترور هڅه، د افغان سوداګر حاجي نوروز عطايي وژل او په هرات کې پر ۷ تنو افغانانو بریدکول په ښارونو کې د ترور زیاتېدو پېښو افغانان اندېښمن کړي دي.
احمد سعیدي د کابل په شهرنو سیمه کې د تېرې سه شنبې په ورځ د وسله والو کسانو د ګولۍ ویشتلو په پایله کې ټپي شو او حاجې نورزو عطايي په هماغه ورځ په خپل کور کې د چاړه په وسیله ووژل شو.
سعیدي وايي، په ده د برید عاملین په حکومت کې د ننه د "ستون پنجم" ډلې کسان دي، خو د عطايي د ترور کسان لا هم معلوم نه دي.
د کورنیو چارو وزارت ویاند صدیق صدیقي سلام وطندار سره په مرکه کې وویل، چې په کابل کې وروستیو ترور پېښو عاملین د "ترهګرو ډولو سره د یوځای شویو شبکو" کار بولي او وايي، چې پولیس د دغو شبکو د نیولو په لټه کې دي او زیاته یې کړه، چې په سعیدي تر برید وروسته یې د دغو شبکو ۲۵ تنه نیولي دي.
دی وايي، چې دغو ډلو په کابل او هرات ولایتونو کې د دوی بریدونه ورته والی لري.
په کابل کې دغه ډول بریدونه مخینه نه لري، خو د هېواد په لویدیځ ولایت هرات کې دا ډول زرګونه پېښې تر سره شوي دي، چې سیاسي، ټولنیز شخصیتونه او سوداګر یې ترور کړي دي.
د سلام وطندار د راپورونو له مخې په تېرو ۱۴ ورځو کې په هرات ولایت کې ۷ تنه ترور شوي دي، چې د ترور شویو کسانو له ډلې ۴ تنه مړه شوي دي او ۳ تنه نور ټپیان شوي دي.
د سیاسي چارو شنونکی لطیف نظري وايي، چې دغه ترورونه د ځنځیري ترورونو سره اړیکې لري او دښمنان په دې کار سره غواړي، چې د افغانانو تر منځ بې اتفاقي رامنځته کړي.
د ده، په باور د ترور پلانونه له هېواده د باندې جوړیږي او هغه کسان ترور کوي، چې د حقیقتونو څخه پرده پورته کوي.
په ورته وخت کې د مدني ټولنې فعالانو نن ورځ (پنجشنبه) په یوې خبري غونډه د ترور کلتور د له منځه وړلو غوښتنه وکړه او د حکومت څخه یې غوښتل، چې په امنیتي پلانونو کې دې د وروستیو ترورنو عاملین په نښه کړي او پرته د ځنډ نه دې محاکمه کړي.
