د هلمند د والي وياند عمرځواک سلام وطندار ته وویل، چې تېره یکشنبه (۲۱اګسټ) شپه مهال زیات شمېر امریکايي سرتیري ددغه ولایت مرکز لښکرګاه "بست" هوايي ډګر کې د سپکو، درنو وسلو او نورو تجهیزاتو سره ځای پر ځای شوي دي.
ځواک وايي، چې د دې سرتېرو کره شمېر نه دی معلوم، خو تر اوږدې مودې پورې به هلته پاتې او د اړتیا پرمهال په هوايي او ځمکنيو عملیاتو کې به د افغان ځواکونو سره یو ځای پوځي بریدونه کوي.
نوموړي زیاته کړه، چې دا سرتيري به د لښکرګاه ښار د ساتنې ترڅنګ د هلمند په نورو سيمو کې د امنيت د ټينګښت له پاره جدي تدابیر لري.
بلخوا د هلمند د ولايتي شورا مرستيال عبدالمجید اخندزاده بيا وايي، چې لا پخوا د هلمند په دوه پوځي اډو کې د امریکايي سرتېرو د موجودیت سره سره ددې ولایت ۲ ولسوالۍ موسی کلا او نوزاد د وسله والو طالبانو له خوا ونیول شوې.
اخندزاده وايي، چې امریکايانو په لوړ شمیر راتګ به ددې ولایت له امنیت سره مرسته و نه شي کړای.
هغه ټېنګار کوي، چې په هلمند کې د امريکايي ځواکونو د ځای پر ځای کېدو سره به د افغان ځواکونو په لیکو کې اصلاحات رامنځ ته شي.
دی همدا ډول زیاتوي، چې د جګړې پر رهبرۍ باندې دې هم له سره غور وشي.
تیرو ۲ شپو راهیسې په امریکایي "اپاچي" او جیټ الوتکو سربیره ډرون الوتکې د هلمند د لښکرګاه او شاوخواسیمې له فضا څاري، چې د وسله والو په جګړه کې یې هم اغیز کړی اوغلچکي بریدونه غلي شوي دي.
که څه هم کومې رسمي سرچېنې په دې اړه څه نه دي ویلي، خو د ځينو سرچینو د معلوماتو له مخې همدا اوس ۳۰۰ امريکايي سرتيري په بست هوايي ډګر کې ځای پرځای شوي او ډیر نور یې بیا په نورو سیمو کې پرمیشت کیدو بوخت دي.
