د فاریاب په قیصار ولسوالۍ کې د ملي او سیمه ییزو پولیسو ترمنځ د نښتې له امله ۵ تنه وژل شوي او ۷ نور ټپيان دي.
د عيني شاهدانو په وینا دغه نښته د قیصار ولسوالۍ د پولیسو قوماندان نظام الدین قیصاري او په ولسي جرګه کې د فاریاب د خلکو استازي او د سیمه ییزو پولیسو قوماندان فتح الله قیصاري ترمنځ د یادې ولسوالۍ په بازار کې رامنځ ته شوې.
فتح الله قیصاري بیا وايي، چې دغه جګړه د کاکا زامنو ترمنځ و او دغه موضوع د سیمه ییزو پولیسو پورې هیڅ اړه نه لري.
د هغه پر وینا، قیصاري عبدالرحمان او نور محمد دواړه د قیصار د قوماندانۍ د پولیسو په تشکیل کې دنده لري.
د قیصار ولسوال رحمت الله قیصاري سلام وطندار ته وویل، چې دغه د تره زامن له ډېر وخت راهیسې کورنۍ ستونزې درلودې.
قیصاري وايي، چې نور محمد له لانجو وروسته د خپل تره زوی سره د پولیسو لیکو ته ورځي او د عبدالرحمان سره د مخامخ کېدو له پاره شېبې شماري او هماغه و، چې نن د ولسوالۍ په بازار کې سره مخامخ شول.
د فاریاب د عامې روغتیا رییس هم وايي، چې دوی ته ۵ مړي او ۷ ټپيان ور وړل شوي دي.
هغه وايي، په ټپيانو کې دوه ماشومان هم شامل دي، چې صحي وضعیت يې ښه دی.
د فاریاب ولایت د امنیه قوماندانۍ امنیتي امر د پېښې د تاید ترڅنګ وايي، چې جګړه د سیمه ییزو او ملي پولیسو ترمنځ رامنځ ته شوې.
خو هغه بیا وايي، چې په دغه نښته کې ۲ تنه وژل شوي او یو بل ټپي دی.
هڅه مو وکړه، چې د پېښې په اړه د نظام الدین قیصاري نظر هم واخلو، خو بریالي نه شو.
