د مدینې په نوم یوې ۱۷ کلنې پېغلې چې کورنۍ یې ورته د افسون نوم اخیسته تېره شپه ځان وژنه کړې.
د دې د خپلوانو په خبره، د تل په څېر یې ماښام له کورنۍ سره په ګډ دسترخوان ډوډۍ وخوړله او د خپلې خوښې تلویزیوني خپرونه یې وکتله او بیا د خوب خونې ته ولاړه.
د مدینې کورنۍ وايي، ګهیځ یې د دې مړ جسد موندلو، چې له خولې او پوزې یې وینه تللې وه.
د دې نجلۍ د کورنۍ یوه غړي د نوم نه خپرولو په شرط سلام وطندار ته وویل، چې نوموړې په یو هلک مینه وه او پلار یې د دوی د کوژدې کولو سره مخالفت ښودلی و.
دغه سرچینه وايي، افسون د خپل پلار د مخالفت له امله د زهرو په خوړلو ځان وژنه کړې.
د ځان وژنې دغه پېښه د فاریاب ولایت میمنې ښار په خواجه ګذر سیمه پېښه شوې ده.
د فاریاب ولایت د پولیسو امنیې قوماندانۍ سرپرست او له جنايي جرمونو سره د مبارزې مدیر جنرال محمد نادر وايي، چې مدینه د میمنې ښار د افغان کوټ لیسې زده کوونکې وه او نوموړې د خپل خوب په بستره کې ساه ورکړې ده.
نادر وویل، جسد یې عدلیي طب ته د څېړنو له پاره لېږلی دی.
د مدینې پلار همایون وايي، د لور په چلند کې هېڅ داسې بدلون نه لیدل کېده او د معمول په څېرل خپلې خونې ته د خوب له پاره ولاړه.
پلار یې وویل، د ګهیځ ۱۰ بجې یې لور د چای څښلولو له پاره راپاڅوله، چې د مدینې مړ جسد یې وموندلو.
