د غزني د قرهباغ کلي یو اوسېدونکي سلام وطندار ته وویل، چې بېګا د شپې یوه بجه یې پهخپله سیمه کې د چاودنې غږ واورېد او سهار مهال یې د البیروني په نوم د نجونو ښوونځی ولید، چې نیم وران شویو.
د دې سیمې یو اوسېدونکي د نوم نهښودلو په شرط سلام وطندار ته وویل، چې دا ښوونځی په یو کرايي کور کې جوړ شویو، چې له ۱۰۰۰ نه زیات زدهکوونکي پهکې په زدهکړو بوخت وو، چې د چاودنې له امله یې اداره او ځېنې ټولګي زیانمن شويدي.
په ورته وخت کې د غزني د پوهنې رییس محمدعابد عابد وايي، چې د لومړنیو معلوماتو لهمخې، تېره شپه ناوخته مهال د دغه ښوونځي ځېنې برخې زیانمنې شوې.
د عابد پر وینا، د دوی او امنیتي ارګانونو څېړنې روانې دي، چې دا کار د چا لهخوا شویدی.
قرهباغ له غزني ښار سره ۲۰ کیلومتره نږدې فاصله لري، چې د طالبانو تر ولکې لاندې سیمه ګڼل کېږي؛ خو دغې ډلې تر دا مهاله د دې پېښې په تړاو څه نهدي ویلي.
هاخوا بیا د جوزجان ولایت د پوهنې ریاست مسوولان وايي، چې تېره ورځ داعشیانو د دې ولایت د درزاب ولسوالۍ د سردرې سیمې له مغلالقاني، ابوزر غفاري او امام بخاري ښوونځیو کتابونه او ښوونیز وسایل له ځانه سره وړي دي.
د درزاب ولسوال رحمتالله حشر د دې مطلب تر څنګ وویل، چې د دې وسایلو ارزښت له ۵۰۰ زرو افغانیو نه زیات دي.
