هغه اسناد چې سلاموطندار ته رسېدلي ښیي چې د سرپل یوه نامسووله وسلهوال حاجي رحیم چې ولسي جرګې ته د نوماند اسدالله ایوبي پلار دی، د خپلو وسلهوالو ډلو او زور په وسیله په څو ټاکنیزو مرکزونو کې د رایو صندوقونه د زوی په ګټه ډک کړي او دغه راز خلک یې هم اړ کړي چې زوی ته یې رایې وکاروي.
د سرپل د ټاکنیزو شکایتونو ولایتي کمېسیون د دې قضیې په اړه په یوې پرېکړې کې چې د ۱۳۹۷ کال د ۸مې میاشتې په ۲۹مه صادره شوې، لیکل شوي چې دغه کمېسیون د هغو شواهدو او اسنادو تر څېړلو وروسته چې د تکزار دویم نمبر نجونو لېسې، د تکزاز شهرکهنه متوسطې، خواجه سرخ او شبوکند مسجد کې د حاجي رحیمالله د ټاکنیزو تخطیو او جرمونو په اړه چې د خپل زوی داکتر اسدالله ایوبي په ګټه یې کړي وو، روښانه شوه چې د ټاکنو سريوالی او مستقیموالی یې له پوښتنې سره مخ کړی او همدا لامل و چې دغه کمېسیون د نافذه قوانینو له مخې په یادو مرکزونو کې د نوموړي رایې باطلې اعلان کړې.
دغه راز د سرپل د ټاکنیزو شکایتونو د ولایتي کمېسیون په یوه بله مصوبه کې چې د ۱۳۹۷ کال د ۹مې په لومړۍ نېټه جوړه شوې، لیکل شوي چې کمېسیون ورته د رسېدلو اسنادو له مخې، د ۱۳۹۷ کال د ۸مې میاشتې په ۱۱مه نېټه د توپخانې مرکز رایې قرنطین کړې وې، خو تر هغې څېړنې وروسته چې د ۱۳۹۷ کال د ۸مې میاشتې په ۳۰مه شوې، روښانه شوه چې په یاد مرکز کې ډېری کارول شوې رایې د رایورکوونکیو د نوملړ له مخې وې؛ نو د کمېسیون په اکثریت پرېکړې سره د ټاکنو قانون او لایحو له مخې باطلې دي.
خو ځايي سرچینې وايي چې په کابل کې د ټاکنو خپلواک کمېسیون په سرپل کې د ټاکنیزو شکایتونو ولایتي کمېسیون تر پرېکړې پرته د دغه مرکز ټولې رایې بیاشمېرلې دي.
ځینې نور اسناد ښیي چې د سرپل د ټاکنیزو شکایتونو ولایتي کمېسیون په مرکز کې خپل مرکزي کمېسیون، د سرپل ولایت مقام او امنیې قوماندانۍ ته لیکلي چې حاجي رحیمالله له اسدالله او له یوشمېر نورو کسانو سره د ۱۳۹۷ کال، د ۸مې میاشتې په لومړۍ نېټه د سهشنبې په ورځ کمېسیون ته ورغلي او د دغه کمېسیون رییس نقیبالله تاتار یې ګواښلی دی.
د دې لیک په یوځای کې د اسدالله ایوبي د پلار حاجي رحیم له خولې یو نقل قول راغلی چې د تأمل وړ دی: «که مو له ما او زما له زوی نه شکایت وکړ؛ تر مرکزه مو لاس خلاص، هېڅ نهشئ کولی.»
ویل کېږي چې حاجي رحیم د پاڅونوالو قوماندان دی چې له ۱۰۰ تر ۲۰۰ وسلهوال کسان لري. خو خپله حاجي رحیم ادعا کوي چې لهدې مخکې یې د کورنیو او دفاع وزارتونو په چوکاټ کې دندې کړي او حکومت د ځان ساتنې په پار څو تنه پولیس ورکړيدي.
حاجي رحیم همدارنګه په ده لګېدلي ټول تورنه ردوي او وايي چې د زوی ټولې رایې یې پاکې دي او ده هېڅوک د هغه زوی ته د رایو ورکولو لهپاره نهدي مجبور کړي.
دی دا هم وايي چې کمېسیون ته له خپلو وسلهوالو سره تللی و؛ خو هغه یې له دروازې بېرون پرېښي او خپله ننوتی او د کمېسیون کارکوونکیو ته یې ویلي چې کابل ته په عریضه شي او دوی به راکشوي.
د دې ترڅنګ، سلام وطندار ته د ولسي جرګې د ټاکنو د ورځې ځېنې ویډیوګانې او عکسونه په لاس ورغلي چې د ټاکنو په ورځ په ټاکنیزو مرکزونو کې د حاجي رحیم اړوند غیرمسوول وسلهوال ښيي. همدارنګه پهدې ویډیوګانو کې موټرې لیدل کېږي چې په هغو د اسدالله ایوبي عکسونه نصب شويدي. په نورو ویډیوګانو کې چې د ولسي جرګې له ټاکنو څو ورځې مخکې جوړې شوېدي؛ په هو کې لیدل کېږي چې د اسدالله ایوبي اړوند څو موټرسایکلسپاره په کتار د سانچارک ولسوالۍ د مرکز په لوري په روان دي.
د شکایتونو، د رایو باطلېدلو او هغو مدارکو په اړه ـ چې د ولسي جرګې د نوماند اسدالله ایوبي او حاجي رحیم اړوندو وسلهوالو کسانو د ټاکنیزو تخلفاتو ته راجع دي ـ د ټاکنیزو شکایتونو کمېسون نظر هم واخلو؛ د دې کمېسیون ویاند او کمېشنر عليرضا سلام وطندار ته وویل، د ټاکنیزو شکایتونو ولایتي دفتر پرېکړې قانوني او د اجرا وړ دي؛ خو «له بدهمرغه چې د ټاکنو خپلواک کمېسیون دا ډول ډېرې پرېکړې جدي نه ګڼي.»
د ده په وینا، ښايي نوماندان ادعا وکړي چې دا لومړنۍ پرېکړې دي او ممکن د استېناف غوښتنه وکړي چې کمېسیون له څېړونو وروسته نهايي پرېکړه اعلان کړي.
لهدې هر څه سره، دا چې د سرپل د ټاکنیزو شکایتونو کمېسیون، د ډاکټر اسدالله ایوبي د تکزار په ښځینه دویم نمبر لېسې، د تکزار زاړه ښار منځنی ښوونځي، خواجه سرخ او شبوکند جومات رایې باطلې اعلان کړي او د کمېسیون د تهدیدولو لهپاره یې حکومتي ارګانونو او د ټاکنیزو شکایتونو مرکزي دفتر ته یې شکایتنامه هم لېږلې؛ خو بیا هم ښاغلی ایوبي له ۷ زرو نه د ډېرو رایو په لرلو سره سرپل ولایت د نوماندانو په نوملړ کې دویم ځای لري.
