د عامې روغتیا وزارت مسوولانو په یوې خبري غونډه کې په هېواد کې د زنځیروي درملتونونو د جوړېدو شرط لیک اعلان کړ. د دوی په خبره، داوطلبان درې میاشتې فرصت لري چې خپل پروپوزلونه وړاندې او ازاده سیالي وکړي.
د عامې روغتیا وزیر فېروزالدین فېروز وویل، هرې یوه زنځیره به ۵۰۰ درملتونونه ولري او موجود درملتونونه یوازې ۷۰ سلنه د زنځیرې پوره کولی شي؛ پاتې ۳۰ سلنه یې د نویو درملتونونو په جوړېدو بشپړیږي.
فېروزالدین فېروز وايي، د زنځیروي درملتونونو په جوړېدو کیفیت لرونکي درمل زیاتېږي او له بېلابېلو هېوادونو او شرکتونو د درملو وارېدېدو او د درملو مختلفو بیو مخنیوی سربېره د دې پرځای چې عامې روغتیا وزارت ته یو کس یا یو درملتون مسوول وي او ځواب ورکړي؛ بلکې د یوې زنځرې مسوول به د دوی پروړاندې مسوول وي.
د دې وزارت د مسوولانو په خبره، تراوسه په افغانستان کې له ۱۰زرو ډېر درملتونونه فارمسست نه لري او غیرمسلکي کسان درمل پلوري، چې د دغې زنځیرې په جوړېدو فارمسستانو ته د کار زمینه برابریږي؛ دغهراز به هر درملتون دوه تنه فارمسستان ولري.
د ښاغلي فېروز په وینا، یوه زنځیره ۱۵ میلیونه افغانۍ ضمانت او یو میلیون افغانۍ قیمت لري چې درمل به یې په سمه توګه څارل کېږي او کنترولېږي.
روغتیا وزارت وايي د هېواد نفوس ته په کتو ۱۶۰۰ افغانان یو درملتون ته اړتیا لري او په راتلونکي یو کال کې به ۷ زنځیرې یا ۳ زره او ۵۰۰ درملتونه ایجاد شي.
