د ولسي جرګې ځينو غړو د ټاکنو له خپلواک کمېسیون څخه غوښتنه کړې، چې ژر تر ژره دې په افغانستان کې د رای ورکوونکو نوملړ لایحه په خپل ویبپاڼه کې خپره کړي.
دغو غړو په نننۍ دوشنبه (۲۹می) عمومي غونډه کې وویل، چې د رايي ورکوونکو نوملړ لایحه په نړیوالو معیارونو برابر او له بریښنايي وسایلو باید کار واخیستل شي.
دوی دا هم وویل، چې د ولسوالیو او پارلماني ټاکنو ۳میاشتې مخکې باید د رايې ورکوونکو د نوملړ لایحه خپره شي.
د ولسي جرګې غړي اسدالله سعادتي وویل، چې د رايې ورکوونکو د نوملړ لایحې جوړول د شفافو ټاکنو تضمین کوونکی او ولس ته د منلو وړ دی.
د ولسي جرګې رییس عبدالرووف ابراهیمي د ټاکنو له خپلواک کمیسیونه وغوښتل، چې د شفافو ټاکنو او له هر ډول سیاسي لاسوهنې لرې ټاکنو له پاره باید جدي هڅه وکړي.
خو د ټاکنو کمیسیون ویاند گلاجان عبدالبدیع صیاد ډاډ ورکړ، چې دوی د رایو ورکوونکو نوملړ لایحه د کمیسیون د غړو له تصویب وروسته ډیر ژر خپروي.
«د رایو ورکوونکو نوملړ لایحې مسوده جوړه شوې نن مو هم له کمیشنرانو سره په جلسې کې وویشله بیا د کمیسیون له خوا تصویب کیږي او وروسته بیا له ټولو سره شریکیږي.»
د ټاکنو خپلواک کمیسیون مسوولین وايي، چې د دوی څیړنو پر بنسټ د رایو ورکوونکو د نوملړ لایحه له ۶۸ میلیونو ډالرو زیات لګښت لري، چې ټاکل شوې د تامین له پاره د افغانستان د ټاکنو له مالي ملاتړو سره خبرې وکړي.
