قبایلي مشران او ځينې پاکستاني ژورنالیستان وايي، چې د پاکستان حکومت په دې وروستيو کې هڅې پېل کړي، څو ازاد قبایل تر خپلې ولکې لاندې راوړي.
دوی وايي، چې د پاکستان حکومت په دې اړه یوه کمېټه هم جوړه کړې.
پاکستاني ليکوال او ژورنالیست رحیم الله یوسفزي سلام وطندار ته وویل، چې له څه مودې راهیسې د پاکستان حکومت په دې اړه يوه پنځه کسیزه کمېټه هم جوړه کړې او دغه کمېټه په بېلابېلو قبایلي سيمو کې کار کوي، چې له دې وروسته ازاد قبایل د پاکستان حکومت تر چتر لاندې کار وکړي یا هم د خېبر پښتونخوا ایالت سره یوځای شي.
یوسفزي زیاته کړه، چې په دې اړه قبایلي مشرانو هم غونډه پېل کړې او تر اوسه د دغو مشرانو دوه نظرونه په ډاګه شوي دي.
د هغه پر خبره، ځينې وايي چې دوی باید د خېبر پښتونخوا په صوبه کې شامله شي، خو ځينې بیا په دې باور دي، چې له قبایلي سیمو دې یوه نوې صوبه جوړه شي ، ترڅو ټول حقونه يې خوندي وي.
په همدې حال کې یو تن قبایلي مشر شاهد الرحمان هم د دې خبرې پخلی کوي او وايي، چې ځينې قبایلي مشران د دې پلان پلوي کوي او ځينې نور بیا مخالفت کوي، چې مخالفین د پاکستان پوځ له زور زیاتي سره هم مخ شوي دي.
له بل لوري ځينې د سیاسي چارو شنونکي بیا وايي، پاکستان هیڅ حق نه لري، چې ازاد قبایل تر خپلې ولکې لاندې راولي، ځکه د دوی پر وینا دغه کړنه د ډيورنډ کرښې د تړون خلاف دی.
دوی وايي، چې مخکې له دې چې پاکستان دغې کړنې لاس پورې کړي باید د ملګرو ملتونو استازی دې راشي او د افغانستان په خوخښه دې پکې ریفرنډم ترسره او نتیجې ته يې عملي بڼه ورکړل شي.
لیکوال او څېړونکی عبدالحمید مبارز وايي، چې قبایل د بريتانیا د واکمنۍ پر مهال یوه آزاده سیمه وه، چې پاکستان ته په میراث پاتې شوی دی.
ځکه د هغه په وینا اوس خپله پاکستانیان هم ورته غېر علاقه بولي.
د نوموړي په وینا، اوسمهال افغانستان کمزوری دی او پاکستان غواړي د دغې کمزورتیا څخه ناوړه ګټه واخلي او دغه علاقه په خپل نوم کړي.
دا په داسې حال کې ده، چې د ډاکټر نجیب الله د واکمنۍ پر مهال پاکستان حق نه درلود، چې قبایلي سیمو ته ننوځي، خو په دې وروستيو کې داسې راپورونه خپاره شوي، چې د پاکستان پوځ په دغو سیمو کې پوځي عملیات ترسره کوي.
هڅه مو وکړه، چې په دې اړه د قومونو، قبایلو او سرحدونو چارو وزارت غبرګون هم ولرو ، خو بریالي نه شو.
