افغانستان پارلمان نمایندهلری نینگ بیرقطاری جمهور رییس و اجراییه باشلیغی کابل و اسلام آباد ارا قول قویگن کیلیشوو اوچون محکمه بولیشینی ایستهگن.
پارلماننینگ چهارشنبه کونگی ییغینیده، قطار نمایندهلر مذکور کیلیشوو توغریسیده خواطر بیلدیریب، اونی مملکت ملی منفتیگه قرشی دیگنلر.
پارلمان نمایندهلریدن بیری شکریه بارکزینینگ ایتیشیچه، بو کیلیشوو افغانستان منفعتیگه ایمس، تیزلیکده بیکار ایتیلیشی کیرهک.
نمایندهلردن بیری فرهاد صدیقیگه کوره، کابل و اسلام آباد ارا قول قویلگن استخباراتی همکارلیکلر کیلیشووی مملکت اهالیسی نینگ بوندن هم کوره کوپراق تلفات بیریشیگه سبب بولهدی.
او، حاضرگه قدر ایریم بولیم لرگه تینچ اهالی تلفاتی آشگن و بو کیلیشوودن کیین عادی خلق تلفاتی ینه ده آشیشی ممکن دیگن.
جناب صدیقینینگ فکریگه قوشیلگن باشقه بیرقطار نمایندهلر، جمهور رییس چیت لنیب اونینگ اورنیگه ینگی جمهور رییس تانیشتیریلیشینی سورهگنلر.
اولرگه کوره، اساسی قانون نینگ 69 – مادهسیگه موافق جمهور رییس وظیفهسیدن چیتلنتیریلیب، عدلی و قضایی ادارهلرگه تانیشتیریلیشی لازم.
اساسی قانوننینگ اوشبو مادهسیده کیلیشیچه، بشریتگه قرشی جرم، ملی خیانت و باشقه شونینگدیک جرملر خصوصیده جمهور رئیس عیبلنیب، پارلمان نمایندهلریدن 3 قسمی بونی تصدیقلسه لویه جرگه تشکیل ایتیلیب، لویه جرگه نینگ هم اوچ قسمی جمهور رییس عیبینی تصدیقلهگن حالده، جمهور رییس عدلی محکمه تنیشتیریلهدی.
پارلمان نمایندهلریدن باشقه بیری غلام حسین ناصری، کابل و اسلام آباد ارا قول قویلگن استخباراتی کیلیشوو دیورند چیزیغی مسالهسی کبی مهم موضوع سنلهدی.
پارلمان نمایندهلریدن باشقه بیری فوزیه کوفی نینگ بو توغریده ایتیشیچه، افغانستان خلقی بو کیلیشوو اولکه منفعتیگه ایمس لیگینی بیلهدی، شو سبب هم حکومت نینگ بو ایشیگه قرشی دیرلر.
ایتیلیشیچه،کیلگوسی هفته یکشنبه کونی ملی امنیت باشلیغی و جمهور رییس نینگ ملی خوفسیزلیک مصلحتچیسی بو توغریده جواب بیریش اوچون پارلمانگه کیلهدی.
مذکور کیلیشووگه قول قویلیشی ملی امنیت باشلیغی و جمهور رییسنینگ ملی خوفسیزیلیک مصلحتچیسی اورتهسیده تارتیشوولرگه سبب بولگن.
ثور آیی نینگ 29- سیده، ملی امنیت باشلیغی رحمت الله نبیل مذکور کیلیشوو خصوصیده ناراضیلیک بیلدیرگن، بیراق اونینگ سوزلری افغانستان جمهور رییسی نینگ ملی خوفسیزلیک مصلحتچیسی حنیف اتمر نینگ عسک العملیگه دوچ کیلگن.
گزارشلرده جناب اتمر نینگ بو ییغینده ایتیشیچه، ملی امنیت ریاستینینگ برچه ملازملری اوشبو کیلیشوونی عملگه آشیرهدی.
کابل و اسلام آباد ارا قول قویلگن کیلیشوو هرتامانلمه تنقیدلرگه دوچ کیلدی.
بیراق ملی امنیت سوزلاوچیسی حسیب صدیقی، ایکّی کون آلدین اوتکزگن خبری ییغینیده بو کیلیشووگه قول قوییلیشی مملکت ملی منفعتیگه دیگن.
