د افغانستان د رڼو ټاکنو بنسټ یا ټیفا بنسټ د موندنو پر بنسټ، د ولسوالیو شوراګانو ټاکنې به په ټاکلي وخت ونهشي.
د دې بنسټ ویاندې صغرا سعادت نن (شنبې) په یوې خبري غونډه کې وویل، د ټاکنو خپلواک کمېسیون د یادو ټاکنو لهپاره لازم تخنیکي چمتووالی نهلري او په اکثرو ولسوالیو کې د ولسوالیو شوراګانو لهپاره د اړتیا وړ نوماندان نهشته.
بلهخوا د ټاکنو خپلواک کمېسیون د رسنیو کمېټې غړی عبدالعزیز ابراهیمي هم د ولسوالیو شوراګانو لهپاره د اړتیا وړ نوماندانو د نه موجودیت موضوع مني او وايي، په ۱۲۰ ولسوالیو کې د ښځینهوو نوماندانو او په ۴۰ نورو ولسوالیو کې د نرانو او ښځینهوو نوماندانو نه موجودیت کمېسیون ته سرخوږی جوړ کړیدی.
د ښاغلي ابراهيمي په وینا، دغه کمېسیون د ټاکنو قانون د ۱۰۴ مادې پر بنسټ کمېټې ته – چې پهدې قانون کې یې وړاندوینه شوې – موضوع سپارلې چې د ولسوالیو شوراګانو د ټاکنو د لاز مهال او یا د هغه د ځنډولو په اړه پرېکړه وکړي.
د تیفا مسوولان وايي، د سیاسي ګوندونو طرحو ته ـ چې یو کال مخکې ټاکنو خپلواک کمېسیون ته ورکړل شوېوې ـ پام نهدی شوی؛ خو د سیاسي ګوندونو اوسنۍ طرحې ته ـ چې د نوملیکنې په بهیر کې دې له بایومیټریک سېستمه کار واخېستل شي ـ جدي اړتیا ده.
دا بنسټ له حکومت، ټاکنو خپلواک کمېسیون، سیاسي ګوندونو او نړۍوالې ټولنې غواړي چې د دې بنسټ غوښتنې جدي وګڼي او خپل مسوولیت ادا کړي.
دا بنسټ وړاندیز کوي چې د ټاکنو خپلواک کمېسیون باید خپلې غونډې او پرېکړې علني کړي او پر څارونکیو بنسټونو د معلوماتو لهپاره د لاسرسی موضوع محدوده نهکړي او لازم معلومات په واک کې ورکړي.
