د ولسي جرګې د خوندیتوب او امتیازاتو له کمېسیونه د ولسي جرګې امتیازغوښتنې مکتوب رسواکېدل د ولسي جرګې د ځېنو غړیو، مدني بنسټونو او وطنوالو له کلک غبرګون سره مخ شویدی.
دغه مکتوب ښیي چې د ولسي جرګې غړیو له ۴۵زره افغانیو ۹۰ زرو ته د خپلو امتیازاتو د لوړېدو غوښتنه کړېده.
پهدې مکتوب کې د وکیل کرېډېټکارتونه له ۵۰۰۰ افغانیو ۱۰ زرو ته لوړ شي، دغه راز، د ولسي جرګې غړي د موټرو د تیلو لګښت باید له ۱۰ زرو افغانیو نه ۲۰ زرو هغو ته او د وکیل د کور کرایه له ۲۵ زرو افغانیو نه ۵۰ زرو افغانیو ته لوړه شي.
د روڼتیا څار بنسټ اجرایوي رییس سیداکرام افضلي سلام وطندار ته وویل چې ولسي جرګې د ۱۳۹۷ مالي کال بودیجې په ردولو سره غوښتي چې پر حکومت فشار راولي.
د ښاغلي افضلي په وینا، پخوا د مالیې وزارت د وکیلانو غوښتنو ته تسلیم شوی او هغه پروژې چې له سره ګټورې نه وې؛ په بودیجه کې شامل کړې وې:
د ولسي جرګې د خوندیتوب او امتیازاتو کمېسیون غړي رمضان بشردوست هم له سلام وطندار سره په اړیکه کې د ولسي جرګې له لوري د ۱۳۹۷ مالي کال بودیجې رد، د وکیلانو امتیازغوښتنه په ګوته کوي، وایي چې ولسي جرګې بودیجه یرغمل کړېده.
د ښاغلي بشردوست په وینا، حکومت تل د وکیلانو غوښتنو ته تسلیم شوی او دا ځل هم د هغوی غوښتنه پوره کوي.
دی د اندېښېنې په څرګندولو سره وايي، له بدهمرغه دا یو ستر ناورین دی چې بودیجه د بېعدالتي، ناانډوله ودې او نورو شعارونو لاندې د خپلو شخصي ګټو لهپاره یرغمل کېږي.
د ښاغلي بشردوست په وینا د ولسي جرګې غړیو د خپلو ګتو لهپاره وطنوال له یاده ویستي نو ځکه خو هر څه ته د امتیازغوښتنې په سترګه ګوري.
خو د مالیې وزارت ویاند اجمل حمید عبدالرحیمزي سلام وطندار ته وویل چې تر اوسه لا د ولسي جرګې د خوندیتوب او امتیازاتو کمېسیون مکتوب مالیې وزارت ته نهدی رسېدلی.
ده په ټینګار سره وايي چې په بودیجه کې به هر ادلون بدلون د ملت په خوښه او د قانون په چوکاټ کې راځي.
دا لومړی ځل نهدی چې د ولسي جرګې غړي له حکومته زیات امتیازات غواړي، بلکې دغه نکل ډېر اوږد او تکراري دی.
