د ولسي جرګې په نننۍ عمومي غونډه کې ځينو وکيلانو د هېواد په بېلابېلو ولايتونو کې د اوسني امنيتي وضعيت په اړه د اندېښنې څرګندولو ترڅنګ وویل، چې د هېواد په کچه امنيتي حالات ورځ تر بلې د خرابېدو په حال کې دي، خو امنيتي لوړ پوړو چارواکو دغې موضوع ته جدي پاملرنه نه ده کړې.
د ولسي جرګې غړي نقیب الله فایق وویل، چې وسله والو طالبانو په تېرو ۱۰ کلونو کې دومره پرمختګ نه وو کړی لکه چې په دې وروستيو کې يې د هېواد په لويو ښارونو کې مخکې تللي.
ده زياته کړه، چې طالبانو نن د کندوز روغتون ته ځانونه رسولي وو او دا د اوسني نظام له پاره د شرم ځای دی.
فایق وايي، چې د کندوز د سقوط له پاره يواځې څو کوڅې پاتې دي.
له بل لوري بیا ځينې نور وکيلان وايي، چې د هېواد اوسني امنيتي وضعيت په اړه باید د امريکا او انګلستان له سفيرانو سره خبرې وشي او د امنيتي تړون په باب ترې پوښتنې وشي.
د ولسي جرګې بل غړي زمرک پادخوابي وویل، چې دوی د خلکو استازي دي او د ټول ملت سترګې دوی ته دي او نه باید له امنيتي وزیرانو سره معامله وکړي.
هغه پر وکيلانو تور پورې کړ، چې د استجواب او استيضاح پرمهال له وزیرانو سره معاملې کوي او باید داځل له دوی سره جدي چلند وشي.
له بل لوري د ولسي جرګې رییس عبدالرووف ابراهيمي وویل، چې په کندوز، بغلان، هلمند، پکتیکا او نورو ډېرو ولايتونو کې امنيتي وضعيت خراب دی او د خرابېدو عمده علت يې د امنيتي ځواکونو بې غوري ده.
هغه د کندوز پر والي تور پورې کړ، چې له مخالفينو سره لاس لري.
د ولسي جرګې مشر زياته کړه، چې د کندوز خلک له دغه والي څخه بې زاره دي.
په دې اړه مو وغوښتل د کندوز د والي نظر هم تر لاسه کړو، خو بريالي نه شو.
په هېواد کې د امنيتي وضعيت د خرابېدو په اړه په وار وار وکيلانو اندېښنې په ډاګه کړي، چې ان څو ورځې وړاندې د وکيلانو له لوري د امنيتي چارواکو د استيضاح پريکړه وشوه او دغه موضوع بیا د څو ورځو له پاره خاموشه پاتې شوه.
اوس بیا ځينو وکيلانو دا پريکړه کړې، چې امنيتي وزیران استیضاح کړي.
