د ولسي جرګې یو شمېر غړي د هیواد په لویو لارو کې ناامنۍ، وسلهوالو غلاوو، تښتونو او یرغمل نیونو اندېښمن کړي دي.
د ولسي جرګې غړی محمدعلي اخلاقي وايي، د غزني ولایت د جاغوري، مالستان، روزګان او د یو شمېر نورو ولسوالیو مواصلاتي لارې د طالبانو په واک کې دي او خلک ځوروي.
په همدې حال کې د ولسي جرګې دویم نایب امیرخان یار چې د دې جرګې د نن ورځې غونډې مشري یې کوله، له امنیتي ځواکونو وغوښتل چې د لویو لارو امنیت ټینګ او د خلکو ځان او مال وساتي.
بل لور ته یوې امنیتي سرچینې د نوم نه خپرولو په شرط سلاموطندار ته وویل چې طالبانو په تېره یوه اوونۍ کې شاوخوا ۱۰ نظامیان او ملکیان د بغلان- کابل له لویې لارې تښتولي دي.
د سرچینې په وینا، طالبانو تېره شپه د دوشي ولسوالي په اوږدو کې ۵ مسافر له موټرو کوز کړي او له ځانه سره یې بیولي دي.
د بغلان اوسېدونکي شریفالله او هارون د لویو لارو په اوږدو کې د امنیتي ځواکونو د پوستو نه موجودیت د مسافرو د تښتولو اصلي لامل بولي. نوموړی وايي، طالبان پهدې وروستیو کې د کابل ـ بلخ او کابل بغلان لویو لارو ته راوځي او خلک ځوروي.
دا په داسې حال کې ده چې وسلهوالو غلاوو، وژنو او تښتونو د لویو لارو ترڅنګ د پلازمینې کابل په ګډون د نورو ولایتونو په مرکزونو کې هم خلک اندېښمن کړي دي.
