د غزني ولایتي چارواکي وايي چې وسله والو طالبانو هغه ۴ وګړي وژلي چې په اجرستان ولسوالۍ کې طالبانو برمته کړي وو.
دغزني د ولایتي شورا غړي خالقداد اکبر وویل، د مالستاني اوسېدونکو په جرګه ورغلي مشرانو او مخورو خبر ورکړی چې وسله والو طالبانو برمته کړي وګړي دجمعې په ورځ وژلي او دوی ته یې د مړو د جسدونو کورنيو ته د سپارلو سپارښتنه کړې.
تېره ورځ د غزني مرستیال والي محمد علي احمدي سلام وطندار ته ویلي و، چې طالبانو ۴ تنه ژوي پلورونکي چې د غزني ولایت مالستان ولسوالۍ اوسیدونکي دي د دې ولایت په اجرستان ولسوالۍ کې تښتولي دي.
د والي مرستیال زیاته کړې وه، طالبانو دغه کړنه د هغو عملیاتو په غبرګون کې تر سره کړې، چې د کب په ۲۴مه د اېتلاف او افغان ملي امنیتي ځواکونو د جاغوري او ګیلان ولسوالۍ په اړوندو سیمو کې تر سره کړل.
د اجرستان ولسوالۍ قومي مخورو د برمته شويو وګړو د خلاصون له پاره وسله والو سره خبرې اترې پیل کړې وې.
دغزني ولایت مرستیال والي هم سلام وطندار ته تایید کړه چې د وسله والو له لورې تښتول شوي ۴ وګړي نن وژل شوي دي.
تر اوسه په دې اړه طالبانو څه نه دي ويلي.
دا په داسې حال کې ده، چې تر اوسه د کابل ـ کندهار پر لویه لاره د ۳۱ برمته شويو مسافرو د برخلیک په اړه هم کوم خبر نشته.
