هلمند ولایتی‌نینگ ناوه تومنی‌ده قورال‌لی طالب‌لرنینگ ملامنصور و ملارسول‌گه وفادار قورال‌لی کیشی‌لری اورتهسیده یوز بیرگن توقنشو نتیجهسیده 30 کیشی نابود بولگن.
تومن‌نینگ ولسوالی احمدشاه سالم‌نینگ سلام‌وطندارگه ایتیشیچه، مذکور ایکّی گروه اورتهسیده بوگون ایرتلب (یکشنبه) توقنشو ملا رسول‌گه طرفدار جنگری‌لر ناوه تومنی‌ده بیر قیشلاق‌نی تصرف قیلگن پیت‌ده یوز بیرگن.
اونینگ سوزلریگه کوره، حاضر اوروش شددتی توخته‌لگن، فقط انده – سنده اوق اوزیش آوازی ایشیتیله‌دی.
ولایت اهالی‌سی‌نینگ سلام‌وطندار ترماغی گه باغله‌نیب، اوروش جریانی‌ده ملارسول‌گه طرفدار جنگری‌لر منطقه‌ده ملا منصورگه وفادار قورال‌لی کیشی‌لرنی قیشلا‌ق‌دن چیقاریش‌گه موفق بولگن‌لیکلرینی ایتگن‌لر.
اهالی‌گه کوره، هلمند ولایتی‌ده 500 جنگری ملا رسول‌گه صداقت بیلدیریب، باشقه طالب‌لرنی هم ملارسول حرکتی‌گه قوشیلیشی‌نی سوره‌گن‌لر.
هلمند ولایتی‌ده ملارسول گه وفادار قورال‌لی جنگری‌لر عبدالله صابر تامانی‌دن رهبرلیک قیلینه‌دی. بو حرکت‌نینگ رسمیلری، توقنشوده ملا منصور طرفدارلریگه آغیر تلفات ییتکزگن‌لیک‌لرینی ایتگن‌لر.
ملا منصور هنوزگچه بو توغریده بیرار نرسه دیمه‌گن.
شونینگ‌دیک ملارسول و ملا منصورگه طرفدار کیشی‌لر بوندن آلدین هم هلمند ولایتی‌نینگ باغران، نوزاد و موسی قلعه تومن‌لریده توقنه‌شیب بیر- بیراولریگه آغیر تلفات بیرگن ایدی.
طالب‌لرنینگ سابق رهبری ملاعمر وفاتی اعلان قیلگن‌دن سونگ، مذکور حرکتی ایکّی دشمندارچیلیک‌که تقسیم بولیدی و هنوزگه ایکی تامان اورتهسیده یوز بیرگن قورال‌لی توقنشولرده اونلب عصیانچی نابود بولیب بیرقنچه‌سی یره‌لندی.
