هلمند دکاندارلریدن بیرقطاری، اوشبو ولایت‌ده جواز بهاسی کوپه‌یگنی‌دن شکایت قیلگن‌لر. هلمند مرکزی لشکرگاه شهریده اوشبو دکاندارلرنینگ سلام‌وطندارگه ایتیشیچه، ولایت شهردارلیگی اوتگن ییل‌لرگه نسبتن بو ییل دکان جوازی بهاسینی 10 برابر کوپه‌یتیرگن.
اولرگه کوره، هلمند شهردارلیگی اوتمیش‌لرده هر بیر دکان جوازی‌گه 200 افغانی آله‌دی ایکن، بیراق حاضر 2500 افغانی آله‌دی. اوشبو دکاندارلرنینگ ایتیشیچه، جواز بهاسی آزه‌یمه‌گن صورتده، دکانلرینی یاپیش‌گه مجبور بوله‌دیلر.
لشکرگاه دکاندارلریدن بیری شریف‌الله نظری‌نینگ ایتیشیچه، اوشبو ولایت‌ده بیر تاماندن اوروش، ناتینچلیک، ایش‌سیزلیک و یوللر یاپیق‌لیگی اهالی‌نی قیین‌چیلیک‌که روپه‌ره قیلگن و باشقه بیر تاماندن شهردارلیک دکان جوازی بهاسینی کوپه‌یتیرگن.
دکاندارلردن باشقه بیری نسیم‌الله هلمندی‌نینگ ایتیشیچه، بوندن آلدین دکاندارلر جواز آلیش اوچون 130 افغانی شهردارلیک‌که تول‌لیدی ایکن، بیراق حاضر مجبوریت‌دن 2-3 مینگ افغانی تول‌لیدیلر.
هلمند مدنی جماعه‌چیلیک باشلیغی سردارمحمد همدردنینگ ایتیشیچه، مذکور ولایت دکاندارلری، جواز آلیش اوچون بونچه مبلغ‌نی تول‌له آلمه‌یدیلر و بو ولایت حاکمی و شهردارلیگی‌دن اهالی‌نی زورلمس‌لرینی سوره‌یدی.
جناب همدردنینگ ایتیشیچه، بو لایحه اوروش‌دن قوتیله آلمه‌گن هلمند ولایتی‌گه ایمس، بلکیم هرات و بلخ دیک کته ولایت‌لرده تطبیق ایتیلیشی کیره‌ک.
بیراق، هلمند شهردارلیگی اورین باسری محمدنسیم مسرورنینگ ایتیشیچه، اوشبو ولایت‌ده دکانلر جوازی وزیرلر کینگشی تامانیدن ینگی‌لیک‌ده تصدیق‌لنگن لایحه اساسیده، کوپه‌یتیریلگن و بو لایحه قندهار ولایتی‌ده هم تطبیق ایتیله‌دی.
هلمند شهردارلیگی اورین باسری‌گه کوره، بوندن آلدین دکاندارلر اوچون 200 و 400 افغانی صادر ایتیله‌دیگن جوازلر رسمی بولمه‌گن و حاضر رسمی جواز صادر ایتیله‌دی.
هلمند ولایتی‌نینگ مرکزی لشکرگاه شهری‌نینگ دکاندارلری، مذکور ولایت‌نینگ کوپینچه قسمت‌لری طالب‌لرنینگ نظارتی‌ده بولگن بیرچاغده، دکان جوازی بهاسی کوپه‌یگنی‌دن شکایت قیله‌دیلر و شونینگ‌دیک، شهرنینگ 4 حوزه‌سیدن بیری طالب‌لر تامانیدن و 3 حوزه دولت تامانیدن اداره بوله‌دی.
