د هرات ولایت د سوداګريو او صنايعو خونو چارواکي وايي، چې په دې وروستيو کې د ناامنيو له کبله شاوخوا ۱۰۰ فابريکې تړل شوي.
د یاد ولایت د سوداګريو خونو مرستيال سیروس علاف له نوي والي غوښتنه کوي، چې په اقتصادي برخه کې د هرات پر وړاندې د حکومت دوه ګوني سیاست ته د پای ټکی کېږدي.
اخوا د هرات ولایت ځينې پانګوال د دغه ولایت له نوي والي غوښتنه کوي، چې د سوداګرو له پاره دې د امنيت په برخه کې جدي ګامونه پورته کړي او په دغه ولایت کې د پانګونې له پاره زياتې زمينې برابرې کړي.
پانګوال وايي، چې په هرات کې د امنیت نه شتون او د حکومت له لوري د پانګونې نه ملاتړ د دې لامل شوي، چې په لسګونه پانګوال د افغانستان څخه خپلې پانګې وباسي.
د هرات ولایت یو تن سوداګر محمد یوسف وايي، چې په دغه ولایت کې پانګه اچونه د نوي والي په کار پورې اړه لري او په وينا يې باید نوی والي د پانګوال امنيت خوندي کړي.
د یاد ولایت بل پانګوال غلام جيلاني حميدي وايي، کله چې په هېواد کې امنيت ټينګ شي، نو پانګوال د پانګونې له پاره پخپله تشويقيږي.
د هرات نوي والي محمد اصف رحيمي هم ژمنه وکړه، چې د دغه ولایت پانګوالو امنيت او د پانګونې د فرصتونو زیاتول به يې د کار په لومړيتوبونو کې ځای ولري.
رحيمي وايي، په هرات ولایت کې د صنعتي ښارګوټي د پراختیا له پاره به اساسي ګامونه واخلي او په دې ولایت کې به سوداګرو ته یو خوندي چاپیریال رامنځته کړي.
اصف رحيمې تېره اونۍ د هرات د نوي والي په توګه دنده پېل کړه، له دې وړاندې یې د کرنې او مالدارۍ د وزیر په توګه دنده ترسره کړې وه.
هرات دافغانستان یو له هغه ولایتونو څخه شمارل کيږي، چې په کې نسبتا سوداګرۍ ته ښه زمينه براره ده خو د ورستيو نا امنیو او سیاسي کړکيچونو له امله په دغه ولایت کې هم د صنعتي او اقتصادي کارونو چندان خوند نشته.
څه موده وړاندې داسې خبرونه هم خپاره شوي و چې نږدې ۲۶ سلنه پانګوالو له هراته خپلې پانګې بهر ویستلي دي.
په دې ولایت کې د صنعتي ښار ګوټي د پراختیا له پاره په تېر کې هلې ځلې شوې وې.
د کشمېرې د اوبدلو، د وسپنې د ویلې کولو، دمرمرو د تراشلو د فابریکو د فعالېدو او جوړېدو خبرونه هم ورکړل شوي و؛ خو اوس مهال په دې ولایت کې سوداګر خپله سوداګري خوندي نه بولي او اندېښمن کړي یې دي.
