هرات ولایتیدن ایشانچلی بیر محلی منبع نینگ سلاموطندارگه ایتیشیچه، بو ولایتده اردو کوچلری نینگ قرارگاهی برابریده بم جایلشتیریلگن موتر پارتلهشی عاقبتیده امنیتی کوچلردن ۶ تهسی هلاک و باشقه ۶ تهسی ایسه یرهلنگن. منبع گه کوره، اوشبو حادثه (یکشنبه کیچه ۲۳- سنبله) مذکور ولایت نینگ زاول تومنیده یوزبیرگن.
منبع نینگ کوپهیتیریشیچه، طالبان بیرینچی ده مازدا تیپلی بم جایلشتیریلگن بیر موتر نی مذکور قرارگاه برابریده پارتلهتگن و کیین ایسه امنیتی کوچلر بیلن آتیشمه گه باشلهگن. اونینگ ایتیشیچه، امنیتی کوچلر و طالبان گروهی آرهسیده نیچه ساعت آتیشمه دوام تاپگن و نتیجهده، ۱۵ طالب هم هلاک ایتیلگن.
منبع بو پارتلش نی سونگی آیلرده مملکتده اویوشتیریلگن اینگ کتته هجوملردن بیری دیدی.
زاول تومنیدن بیر محلی منبع آتی فاش ایتیلیشی نی ایستمهی سلاموطندارگه ایتیشیچه، طالبان اوشبو بم جایلشتیریلگن موتر نی مذکور تومن نینگ «عزیز» آباد منطقهسیده جایلشگن اردو کوچلری نینگ قرارگاهی نی ۱۰۰ مترلیگیده توختهتیب و راکت اوقی آتیش بیلن پارتلتگن.
منبع گه کوره، پارتلهش کوپ کوچلی ایکن و اردو نینگ قرارگاهی شامل منطقهدهگی اویلردن کوپینچهسی تخریب بولگن.
شونینگدیک بو منبع نینگ ایتیشیچه، بو هجوم ده اردو کوچلریدن ۶ تهسی هلاک و باشقه ۶ تهسی یرهلنگن و طالبان قرارگاه اطرافی گه ماین کومگن.
گرچند بو هجوم ایکی کون آلدین یوزبیرگن، بیراق هرات امنیتی مسئوللری بو توغریده آرتیق تفصیلات بیریشدن واز کیچگن. شونینگدیک طالبان حاضرگچه بو حقده فکر بیلدیرمهگن.
