مملکت غربی‌ده جایلشگن هرات ولایتی‌نینگ اهالیسی بوگون چهارشنبه حوت آیی نینگ 13-سی‌ده برق قیمتی یوقاری کوتاریلگن لیگی‌گه اعتراض بیلدیریب، دکان‌لری‌نی یاپیب، ایش تشله‌گن‌لر.
هرات‌ده بو عمومی ایش تلش‌ده، شهری‌نینگ گوجوم خیابان‌لری آغیر سکوت اختیار قیلیشگن.
سونگی وقت‌لرده هرات ولایتی‌ده بیر کیلوات برق اوچ افغانی و تورت پول‌دن بیش افغانی و ییگیرمه پول‌گه آشیریلگن. برق نینگ قیمتی کوتاریلیش آرتی‌دن ولایت اهالیسی اعتراضی‌دن کیین ولایت سرپرستی اصیل‌الدین جامی برشنا شرکتی مسوول‌لری بیلن بیر کیلوات برق نینگ قیمتی بیش افغانی ییگیرمه پول‌دن تورت افغانی‌گه کمیتیریلگن‌لیگی باره‌سی‌ده کیلیشگن‌لیگی‌نی اعلان قیلدی.
لیکن، یو نرخ اهالی اعتراضی‌گه یکون یسمه‌دی. نهایت‌ده سه‌شنبه کونی حوت آیی نینگ 12- سی‌ده بیرلشمه‌لر، گذر وکیل‌لری، دین عالملری، اهالی نماینده‌لری و مدنی جماعه چیلیک فعال‌لری ییریک ییغین اوتکزیب، ایکّی کونگه قدر عمومی ایش تشله‌گن لیک‌لری‌نی بیلدیردی.
هرات‌نینگ تورت یول‌لریده اعتراضچی‌لر چادر تیکله‌گن‌لر. چادر ده تحصن قیلگن آقسقال‌لر و قوم یاش اولوغ‌لری ولایت اهالی‌سی‌نینگ ایسته‌گی‌گه مرکزی دولت اعتبار قرتمه گونگه قدر، اعتراض وایش تشلش‌لری‌گه دوام ایتیریش‌لری باره‌سی‌ده آگاه‌لنتیرگن‌لر.
اعتراضچی‌لر، داروخانه‌لر، شفاخانه‌لر و نان پزلیک‌لردن تشقری برچه مغازه‌لر، خصوصی تجارت شرکت‌لری، تجارت مرکزلری و ایش خانه‌لر یاپیلیشی توغری‌سی‌ده قرار آلگن‌لر.
بو اعتراض‌نی یولگه قویگن‌لرگه کوره، بوندن بویان هرات ولایتی نا عادلانه قانون‌لرنی سینَش و تبعیض مرکزی بولمی‌دی.
ایش تشله‌گن‌لردن بیری عبدالقدیر صالحی، مرکزی حکومت بو خصوص‌ده جدی اعتبار قرتمه‌گن حالده، مدنی حرکت‌لری‌گه دوام ایتیریش‌لری حقی‌ده آگاه‌لنتیرگن.
بونده‌ی ییریک اعتراض‌لر ولایت‌ده برشنا شرکتی تامانی‌دن برق قیمتی آشیریلگن‌دن کیین یولگه قوییلیب کیلماقده.
