د ازادو رسنیو د ملاتړ بنسټ (نی) مسوولین وايي، چې د وارسا په غونډه کې د ناټو غړيو هېوادونو مشران باید له افغان حکومت سره په شرایطو مرستې وکړي او حکومت باید د دغه سازمان د مرستو په مقابل کې د دوی شرایط عملي کړي.
د وارسا سرمشریزه د ناټو او غوڅ ملاتړ ماموریت د غړیو هېوادونو له خوا د روانې جولای میاشتې په اتمه او نهمه د پولند په وارسا کې جوړیږي.
د افغانستان امنیت شورا سلاکار محمد حنیف اتمر پرون ورځ په کابل کې خبریالانو ته وویل، چې دوی د وارسا په غونډه کې په شپږو برخو کې مشخصې غوښتنې وړاندې کړي.
د امنیت شورا سلاکار وايي، چې د راتلونکو پنځو کلونو له پاره د امنیتي ځواکونو د مالي سرچینو د ټینګښت، د هوايي ځواک پیاوړي کول او تجهیزول، د هوايي ځواک تر پياوړي کېدو پورې له امنیتي ځواکونو د ناټو او
امریکا هوايي او کشفي ملاتړ او دوه نورې غوښتنې یې تر ډېره د امنیتي ځواکونو د روزنې، مالي ملاتړ او تجهیزاتو او له ترهګرۍ سره پر مبارزې ورټولې دي.
صدیق الله توحیدي د ناټو له غړیو هېوادونو غواړي، چې اطلاعاتو ته د لاس رسي قانون د پلي کولو، له ازادو او خصوصي رسنیو ملاتړ، د بیان له ازادۍ ملاتړ، د ټاکنیز نظام سمون، د ولسي جرګې او ولسوالیو شوراګانو د ټاکنو پیلول او له فساد سره د مبارزې کولو په شرط دې له افغان حکومت سره مرستې وکړي.
دغه بنسټ وايي، چې په وارسا غونډه کې له افغان حکومت نه باید وغوښتل، چې د خبریالانو سره د شوي تاوتریخوالي عاملین دې په سزا ورسوي او د رسنیو مالي او معنوي ملاتړ وکړي.
د توحیدي په وینا، حکومت باید پرې نږدي چې رسني د مالي، امنیتي او فني اړخه بندې شي.
په ورته خت کې د افغانستان د ملي امنیت شورا سلاکار وايي، چې د ناټو او نړیوالې ټولنې له خوا د امنیت، ښې حکومتولۍ، اقتصاد، ټولنیزو او فرهنګي چارو کې ۴۲ ژمنې شوې وې، چې ۳۰ سلنه یې عملي شوي او په نور یې کار جریان لري او د نړیوالو قناعت مو تر لاسه کړی دی.
