د افغانستان له ازادو رسنیو د ملاتړ اداره یا نی د خبریال د ملي ورځې په را رسېدو سره وايي چې روان کال د بیان ازادۍ او د رسنیو وضعیت بدتر شوی دی.
د نۍ ادارې مسوولان وايي، د رسنیو اقتصادي ستونزې، د حکومت له خوا له رسنیو او خبریالانو د ملاتړ نه موجوديت او اطلاعاتو ته د لاسرسي نه موجوديت هغه لویې ننګونې دي چې د خبریالانو د فعالیتونو پر وړاندې خنډ دي.
د افغانستان له ازادو رسنیو د ملاتړ ادارې اجراييوي رییس مجیب خلوتګر وايي، حکومت نه باید د سولې په داسې خبرو اترو کې برخه واخلي چې د بیان ازادي په کې پام کې نه نیول کېږي.
دغه راز خبریالان هم د امریکا او طالبانو ترمنځ د سولې په خبرو کې د بیان ازادۍ له پامه غورځولو نه شکایت لري او وايي، د افغانانو ترمنځ را روانو خبرو اترو کې د رسنیو حضور اړین دی.
په ورتهو وخت کې د بشري حقونو خپلواک کمیسیون هم په یوه ټوېټري پیغام کې ویلي چې د هېواد خبریالان او رسنۍ د اطلاع رسونې په دنده کې د وسلهوالو مخالفینو، دولتي چارواکيو او زورواکو له تاوتریخوالي سره مخ دي.
د بشري حقونو خپلواک کمیسیون همدارنګه ویلي چې ازاد او خپلواک خبریالان او رسنۍ باید له قانوني او کاري خوندیتوبه برخمن وي او د حکومت له خوا یې ملاتړ وشي.
همدارنګه ارګ او سپېدار ماڼیو هم په جلا جلا اعلامیو کې د خبریال د ملي ورځې مبارکي ورکړې او ویلي یې دي چې د بیان په ازادۍ به معامله ونه شي.
