تشقی ایشلر وزیرلیگی اوتگن کونی بیر مکتوب آرقه‌لی، اوشبو وزارت ایشلاوچی‌لریدن اجتماعی ترماقلرده سیاسی و امنیتی موضوع‌لر خصوصیده، فکر بیلدیریشدن قول تارتیش‌لرینی سوره‌گن.
بیراق، افغانستان ایرکین میدیالریدن حمایت قیلووچی اداره یا-ده «نی» تشکیلاتی بیر خبرنامه آرقه‌لی، تشقی ایشلر وزیرلیگی تامانیدن ترقه‌تیلگن مکتوب‌نی اساسی قانونگه قرشی عنوان قیلگن.
نی تشکیلاتی تامانیدن ترقه‌تیلگن خبرنامه‌ده ایتیلیشیچه، «هر دولتی یا-ده خصوصی اداره‌لر اوزنینگ خاص پالیسی‌سی اساسی‌گه فعالیت قیله‌دی، بیراق پالیسی نینگ مملکت قانونیگه قرشی بولمه‌یشی کیره‌ک. تشقی ایشلر وزیرلیگی تامانیدن ترقه‌تیلگن مکتوب اساسی قانونگه قرشی دیر و ایرکین سوزگه قرشی توخته‌ش‌نی اثبات‌لیدی.»
تشقی ایشلر وزیرلیگی نینگ اوشبو حرکتی اجتماعی ترماقلر فعال‌لری نینگ ایجابی و سلبی واکنش‌لری بیلن روپه‌ره بولگن.
بیراق، تشقی ایشلر وزیرلیگی سوزلاوچیلیک دفتری نینگ سرپرستی گران هیواد نینگ نی تشکیلاتی تامانیدن ترقه‌تیلگن اعلامیه‌گه قرشی ایتیشیچه، اجتماعی ترماقلردن فایده‌لنیش رهنمودی 6 آی آلدین اساسی قانون، میدیالر قانونی و معلومات‌لرگه قول تاپیش چهارچوبی اساسیده تیارلنگن دیر.
جمهورلیک ریاستی نینگ توییتر صحیفه‌سیده، تشقی ایشلر وزیرلیگی نینگ سیاسی و اقتصادی اورین باسرلری اوشبو وزارت‌ده اصلاحات کیرتیش‌لری خصوصیده بولگن ریجه‌لرینی جمهور رییس‌گه بیان قیلگنی ایتیلگن بیرحالده، مذکور وزارت نینگ اوشبو مکتوبی صادر قیلینه‌دی.
