مملکت قتناو یوللریده‌گی ناتینچلیک، قوراللی اوغیرلاوچیلیک‌لر، طالبان گروهی‌نینگ گروگه آلیش‌لری و ناقانونی قوراللی گروهلرنینگ فعالیت‌لریدن اهالی خواطرلری دوامیده، بوگون نماینده‌لر کینگشی اعضالریدن بیرقطاری، خوفسیزلیک اداره‌لریدن اهالی‌نینگ خواطرلریگه نقطه قوییب و اولرنینگ مال و جانی و خوفسیزلیک‌لری تأمین‌لنیشی توغریسیده جدی شکلده دقت قیلیش‌لرینی سوره‌دی.
غزنی نماینده‌لری‌نینگ ایتیشیچه، غزنی‌نینگ جاغوری، مالستان و باشقه تومن‌لری‌نینگ قتناو یوللریده طالب‌لر حاکم دیر و بو قتناو یوللرده یولاوچی‌لرنی اذیت قیله‌دیلر.
نماینده‌لر کینگشی‌نینگ بوگونکی ییغینی‌نی رهبرلیک قیلگن نماینده‌لر کینگشی‌نی ایکینچی اورین باسری امیرخان یار، خوفسیزلیک اداره‌لریدن قتناو یوللر خوفسیزلیگی تأمین‌لنیشی گه جدی شکلده دقت قیلیش‌لرینی سوره‌دی.
عین حالده، آتی فاش ایتیلیشی‌نی ایستمه‌گن امنیتی بیر منبع نینگ سلام‌وطندارگه ایتیشیچه، بیر هفته جریانیده طالبان گروهی بغلان-کابل قتناو یولیدن کمیده 10 حربی و تینچ اهالی‌نی اوغیرلگن.
شو توغریده…
اوشبو منبع گه کوره، اوتگن کیچه هم طالب‌لر دوشی تومنی‌نینگ یولیدن 5 یولاوچی‌نی آلیب کیتگن.
بغلان یشاوچیلریدن ایکی کیشی شریف‌الله و هارون‌نینگ ایتیشیچه، قتناو یوللرده خوفسیزلیک پوسته‌لری یوقلیگی باعث، ناتینچلیک و یولاوچی‌لرنی اوغیرلش کوپه‌یگن.
عین حالده، ناتینچلیک، آدم اوغیرلاوچیلیک، قوراللی اوغیرلاوچیلیک‌لر و ترورچیلیک یالغیز مملکت قتناو یوللری و کته جاده‌لریگه خلاصه بولمه‌یدی و اهالی شهرلرده هم بو وضعیت‌لردن خواطرلنه‌دی.
