نمایندهلر مجلسی بوگون (چهارشنبه) بیر بیانات نشر قیلیب، دنیا جماعهچیلیگی دیورند چیزیغیگه تیگیشلی حجتنی تیکشیریب، افغانستان و پاکستان اورتهسیدهگی جَنجَللرگه پایان بیریشنی سورهگنلر.
اعلامیهنینگ دوامیده یازیلیشیچه، نمایندهلر مجلس اعضالری دنیا جماعهچلیگینینگ بوتون همکارلریدن افغانستان بیلن قول قوییلگن امنیتی بیتیم اساسیده عمل قیلیب، ملی حیثیت و ییر بوتونلیگینی مدافعه قیلیش اوچون افغانستان خلقیدن آرقهداشلیک بیلدیریشلرینی طلب قیلگنلر.
شونینگدیک ملی مجلس حکومتدن هم قوشنی مملکتلرنینگ هر قندهی غرضلی ارهلهشیشی آلدینی آلیش و مملکت ییر بوتونلیگی اوچون ملی منفعتلر اساسیده ایاق کوتاریشینی سورهگنلر.
مجلس نینگ بوگونکه ییغینیده پارلمان نینگ کوپچیلیک نمایندهلری اخیرگی کونلرده پاکستان تامانیدن عملی بولگن خطالرگه عکسالعمل بیلدیریب، ایکّی مملکت اورتهسیدهگی قرمه قرشیلیک حل بولیشی اوچون دیپلوماتیک یول قیدیریلیشی اوستیده تاکید قیلگنلر.
عین حالده، پارلمان نینگ اعضالری تورخم نینگ صفری منطقهسیده پاکستانلیک حربیلر تامانیدن حربی قرارگاه تاسیس ایتیلیشی اوچون آلیب باریلگن سعی وحرکت خلق ارا اصوللرگه ضد بیر عمل دیب، افغانستان پولیس کوچلری شهامتینی آلقیشله گنلر.
پارلمان ییغینینی رهبرلیک قیلگن مجلسنینگ ایکینچی اورین باسری نعمت الله غفارینینگ سوزلریگه کوره، ملی بیرلیک حکومتینینگ رهبرلری تورخم دهگی قوراللی توقنشوونی جدی آلیشلری کیرهک.
نمایندهلر مجلسی نینگ اعضاسی خانم شینکی کروخیل، تورخم دهگی قوراللی توقنشووگه عاید مساله اوچون افغانستاننینگ اوچله قوهسی بیرلیکده موضعگیرلیک قیلیشلری توغریسیده تاکید ایتگن.
شوکبی پاکستانلیک حربیلر قیلمیشیگه ضد عکس العمل بیلدیرگن ملی کوچلرنی آلقیشلهگن پارلمان اعضالری حکومتدن حیاتدن کوز یومگن خانه دانلرگه جدی اعتبار بیریشنی طلب قیلگنلر.
عین حالده، تینچ لیک و اوزگریش ناملی فعال یاشلر ترماغی بوگون کابلده بیر خبری ییغین اوتکزیب افغان ملی کوچلریدن اوز حمایتلرینی اعلان قیلگنلر. ایتیلیشیچه، هرات اهالیسی هم نمایش اوتکزیب ملی کوچلردن آرقهداشلیک بیلدیرگنلر.
یکشنبه کون کیچکی وقتده افغانستان و پاکستان چیگرهچیلری اورتهسیده قوراللی توقنشوو یوز بیرگن ایدی. اوروش پاکستانلیک حربیلر چیگره صفری منطقهسیده حربی پوسته تاسیس قیلیش اوچون اولگورگن بیر چاغده باشلندی.