.jpg)
هغه میرمن، چې دوه ورځې وړاندې يې پرمخ تیزاب شیندل شوي وايي، له هېچا سره شخصي دښمني نه لري.
نفیسه له خپل خاوند او دوه ماشومانو سره د کوچني اختر په دویمه د شپې پر ۱۱ بجو، چې د کابل ښار د اریا ښار ګوټي پر لور روانه وه نا پيژاندو کسانو یې پرمخ تیزاب شنیدلي، چې اوس د استقلال په روغتون کې بستر ده.
ځوانه میرمن نفیسه، چې اوس يې د څېرې ښکلا له لاسه ورکړې سلام وطندارته وویل، د ژوند لویه پوښتنه یې داده، چې چا يې پرمخ دغه ناروا روا بللې او لامل یې څه دی؟
د نفیسې چې د واده ۳۲ کاله تیریږي وايي، چې له هېچا سره شخصي دښمني نه لري او نه هم پر چا شک لري.
میرمن نفیسې وویل، بریدګر چاغ او لوړ قد درلود چې پرخبره یې د اریا ښار ګوټي ساتونکي هم دې ته په څومترۍ کې وو، چې ددغه پېښې سره هغوی ځان هم نه خوځاوه.
نفیسه ډاکټره ده، چې له دوه کلنو را په دې خوا یې د کورنیو کارونو له امله ډاکټرۍ ته شا کړې.
.jpg)
له نفیسې مو و پوښتل، چې ددې پیښې عاملينو په اړه له امنیتي بنسټونو څه غوښتنه لرې؟ په سړه او ناهیلې انداز یې وویل، "هېڅ غوښتنه نه لرم" ځکه پوهیږي چې ددې پیښې عاملان به ونه نیول شي.
د نفیسې خاوند عبدالطیف وايي، چې نور په افغانستان کې نه شي پاتې کیدلای، ځکه د میرمن او اولادونو له پاره یې هره شېبه انديښمنونکې ده.
عبدالطیف وویل، له هېچا سره یې دښمني نه لرله او نه پوهیږي، چې ولې داسې پېښې سره مخ شول.
بل خوا د نفیسې ورېره سمیرا، چې د پيښې پروخت له هغې سره وه وايي، پر نفیسې چې کوم سړي تیزاب وشیندل لیدلی یې دی.
د سمیرې پرخبره که څه هم خور یې او د نفیسې دوه زامن له دې سره و، خو تیزاب شیندونکي سړي مخامخ د نفیسې پر مخ تیزاب وشیندل او په هغه موټر کې و تښتیدلو چې ده ته ولاړ و.
نوموړې زیاته کړه: " یو سړی، چې کالي یې پر تن و مخ یې پر دستمال پيچلی و ترهغه ځایه چې خلک وو روښنايي وه څه یې نه ویل له موټر ښکته شول، چې په هغه موټر کې څو کسان نور هم وو زموږ له شا ورو ورو تیاره ځای ته راغلل نور یې څه و نه ویل پرمخ یې تیزاب راوشیندل."
په همدې اړه په استقلال روغتون کې د نفیسې معالج ډاکټر شریف یوسفي وايي، چې دغه میرمن ۲۰ سلنه سوځېدلې او د درملنې امکان یې شته دی.
بل خوا د کابل ښار د جنايي جرمنو پرضد د مبارزې رېیس فریدون عبیدي سلام وطندار سره په خبرو کې وویل، چې پولیسو ددې پيښې عاملانو د پيژندلو څېړنې پيل کړي دي.
هغه وايي، دا یو پلان شوی عمل و.
د نوموړي پر وینا، په دې اړه یو شمیر مظنونین پيژندل شوي دي، چې له کابل بیرون تر تعقیب لاندې دي.
یاده دې وي، دا لومړی ځل دی، چې د پلازمینې په یوه امنه سیمه کې د یوې میرمنې پر مخ د نا پيژانده کسانو له خوا تیزاب شیندل کیږي.
