بوگون «پنج‌شنبه» بروکسل‌ده یولگه قوییلگن بیر ییغینده نطق سوزله‌گن ناتو تشکیلاتی‌نینگ باش کاتبی ینس استولتنبرگ‌نینگ معلوم قیلیشیچه، ناتو داعش گروهی‌نی نابود ایتیش اوچون بو گروه‌گه قرشی بیرلشیک‌که قوشیلگن. اونینگ ایتیشیچه، ناتو داعش‌گه قرشی اوروش‌ده جدی قرار آلگن.
ناتو باش کاتبی‌نینگ ایتیشیچه، ناتو تشکیلاتی داعش گروهی‌نی نابود ایتیش اوچون اویغونلیک ایجاد ایتیش، اوروشچن تیک اوچرلرنی تیارلش و نفتی نیازلرنی حل ایتیش نیتی‌ده داعش‌گه قرشی بیرلشیک‌که قوشیلگن.
جناب استولتنبرگ گه کوره، ناتو تشکیلاتی داعش گروهی‌نی نابود ایتیش اوچون جدی قرار آلگن و شو یوز دن داعش‌گه قرشی بیرلشیک‌که قوشیله‌دی، بیراق ایرکین شکلده اوروش‌گه اَره‌لشمه‌یدی. اونینگ ایتیشیچه: «بیزلر ییر عملیات‌لریگه اشتراک قیلمس‌دن داعش‌گه قرشی بیرلشیک‌که قوشیله‌میز.»
ناتو باش کاتبی‌نینگ ایتیشیچه، بوگونکی ییغینده اولر استخباراتی معلومات‌لرنی شریک قیلیش مرکز ایجاد ایتیلیشی اوستیگه کیلیشگن‌لر.
ناتو تشکیلاتی، افغانستان‌نینگ کوپینچه ولایت‌لریده داعش گروهی فعالیت‌لرینی کینگه‌یتیرگن بیرچاغده داعش‌گه قرشی بیرلشیک‌که قوشیلگن و بو گروه ایریم پیت‌لر امنیتی کوچلرگه قرشی اوروشه‌دیلر.
افغانستان وضعیتی‌نی خواطرلی دیگن ناتو باش کاتبی‌نینگ ایتیشیچه، اوشبو مملکت‌ده حاضرگچه عصیانچیلیک و داعش خطری کوچلی دیر. اونینگ ایتیشیچه، افغانستانده ناتونینگ اوروش ماموریتی یکونلنگن، بیراق امنیتی کوچلرنینگ ظرفیتی‌نی آشیریش و تعلیمات بیریش اوچون افغانستانده قاله‌دیلر.
اونینگ اورغولشیچه، افغانستانده اوروش ماموریتی‌نی قیته‌دن باشلمه‌یدیلر.
جناب استولتنبرگ‌نینگ ایتیشیچه، افغانستان امنیتی کوچلری، ترورچیلیک گروه‌لرگه قرشی کوره‌شه آله‌دیلر.
شونینگ‌دیک، اوتگن کون ناتو باش کاتبی‌نینگ اورغولشیچه، افغانستانده ناتونینگ اوروش رولی یکونلنگن، بیراق اوشبو تشکیلات‌نینگ 13 مینگ عسکری، افغانستان حربی‌لریگه مصلحت و تعلیمات بیره‌دیلر.
