اروپالیک مملکت‌لرده انسان قاچاقی و ناقانونی مهاجرلیک‌که قرشی چیکلاولر دوام قیلماقده، بیراق هر ییل کوپ قطار یاش‌لر مملکتده ایش تاپیش‌گه موفق بولمه‌گنی سبب، قطار قیین‌چیلیک‌لرنی تحمل قیلیش بیلن ناقانونی مهاجرلیک آرقه‌لی اروپا باریش اوچون یولگه چیقهدیلر.
محمود (مستعار آت) کمبغللیک و ایش‌سیزلیک سبب، ناقانونی یول‌لر آرقه‌لی ایران و ترکیه یولی بیلن اروپا گه بارگن؛ بیراق نیچه مدت‌دن سونگ، ینه اوز مملکتی‌گه قیتیب کیلگن.
اونینگ ایتیشیچه، یول مسیریده ایران پولیسی تامانیدن کلتک‌لنگن.
محمود و باشقه باش‌پناه ایزلاوچی‌لر اورپا مملکت‌لریگه باریش اوچون کوپ قطار قیین‌چیلیک‌لرنی تحمل قیلگن.
محمود ایران و ترکیه‌گه تارتگن زحمت‌لری خصوصیده بونده‌ی دیدی: « اوچ کون ایران‌ده قالدیم و پولیس دن قورقگنی سبب، یاشینه‌ریدیم و مشهد دن تهران گچه قاچاقچی بیلن بیر موترگه ایدیم، نیچه ساعت او ییرگه قالدیم و قاچاقچی نینگ سونگی حرکتی‌نی کوتیب و اوندن سونگ، قاچاقچی کیلیب بیزنی ترکیه آلیب باردی و او ییرگه باشقه قاچاقچی‌گه تاپشیردی.»
محمودنینگ ایتیشیچه، ترکیه‌ده نیچه مدت حیات کیچیرگنیدن سونگ، همراه‌لری بیلن یونان تامان یولگه چیقگن : « نیچه مدت ترکیه‌ده قالدیم باشقه عایله‌لر کیلگنی‌دن سونگ، کیمه آرقه‌لی، یونان تامان حرکت قیلدیک. یونان توپراغی‌گه بارمسدن آلدین بیرلشگن ملت‌لر تشکیلاتی کیلیب بیزنی دینگیزدن تسلیم آلدی و بیرلشگن ملت‌لر تشکیلاتی‌گه قید قیلیندیک و اوندن سونگ، آلمان تامان یولگه چیقدیک و آلمان‌گه ییتیشدیک، بیراق ایش یوق ایدی و بیر ییل ایش‌سیز ایدیم و بیزگه بیره‌دیگن پول ییترلی ایمس ایدی.»
محمود نینگ ایتیشیچه، آلمان‌ده بیر مدت سرنوشت‌سیز حیات کیچیرگن و اوندن سونگ اوز ایسته‌گی اساسیگه افغانستان‌گه کیلگن. او حاضرده روحی نطقه‌نظردن کسل دیر و امید‌سیز شکلده تیریک‌چیلیک قیله‌دی.
قاچقین‌لر و باش پناه‌ایزلاوچی‌لر وزیرلیگی مصلحتچیسی سیدعبدالباسط انصاری نینگ ناقانونی مهاجرلیک خصوصیده سلام‌وطندارگه ایتیشیچه، اوشبو وزارت باشقه نهادلرنینگ یاردمی آرقه‌لی، معلومات بیریش برنامه‌نی یولگه قویگن و اوشبو برنامه ناقانونی مهاجرلیک‌که توسیق بولیش اوچون فایده‌لی دیر.
اونینگ کوپه‌یتیریشیچه، اهالی‌گه معلومات بیریلگنی‌دن سونگ، ناقانونی مهاجرلیک رقمی کمه‌یگن.
خلق ارا مهاجرلیک تشکیلاتی سوزلاوچیسی کاظم الهام نینگ ایتیشیچه، اوشبو نهاد قاچقین‌لر و باش پناه‌ایزلاوچی‌لر وزیرلیگی یاردمی بیلن افغانستان‌گه قیتیب کیلگن مهاجرلرگه ایش زمینه‌سینی یره‌ته‌دی.
افغانستانده ایش‌سیزلیک، کمبغللیک و ناتینچ‌لیک بولگنی سبب، هر ییل اوشبو مملکت یشاوچی‌لریدن یوزلرچه‌سی ناقانونی شکلده کوپ قطار قیین‌چیلیک‌لرنی تحمل قیلیش بیلن چیتایللیک مملکت تامان یولگه چیقهدیلر.
