هرات ولایتیده خواجه عبدالله انصاری مسجدی‌نینگ امامی مولوی فضل‌الرحمن، مملکت میدیالری برابریده جهاد فتواسی بیرگن. اوشبو دین عالمی‌نینگ ایتیشیچه، هر بیر کیشی میدیا ایشلاوچی‌لرینی اولدیرگنده غازی بوله‌دی.
مذکور امام، میدیالرنی فساد عاملی دیب و میدیاگه دقت قیلیش خصوصیده، جمهور رئیس‌نی کفایت سیزلیک‌که عیب‌لگن. اونگه کوره، میدیا بیلن علاقه‌سی بولگن دین عالم‌لری «فاسد و درباری» دیر.
شونینگدیک، خواجه عبدالله انصاری مسجدی‌نینگ امامی مولوی فضل‌الرحمن، جمهور رئیس غنی‌نینگ تورموش اورتاغی‌نی تنقید آستی گه آلیب و ایتیشیچه، «رولاغنی بهودی دیر و هر کیم بو عیال‌نی مملکت‌نینگ بیرینچی خانمی دیگن صورتده، ایمانی زیان کوره‌دی.»
اوشبو بیانات میدیا و خبرچیلرگه طرفدار اداره‌لرنینگ عکس‌العملی گه سبب بولدی.
افغانستان ایرکین میدیالریدن حمایت قیلووچی دفتر (نی) تشکیلاتی‌نینگ ولایتی مسؤولی حامد مؤمن، اوشبو بیانات امنیتی اداره‌لر، عالم‌لر کینگشی و حج و اوقاف وزیرلیگی تامانیدن تیرگاوگه آلینیشی‌نی سوره‌گن. اولرنینگ آگاه‌لنتیریشیچه، بو قضیه تیکشیریلمه‌گن صورتده، کینگ ناراضیلیک نمایش‌گه قول اوروش‌لری ممکن.
سلام‌وطندارگه صحبت بیرگن خبرچی خوشحال سیلاب‌نینگ ایتیشیچه، بو موضوع خواطرلی دیر و بونگه دقت قیلینیشی لازم. خبرچی‌لردن باشقه بیری نصیر فیروزنینگ ایتیشیچه، هرات ولایتیده مذهبی فضا جوده هم یمان بولگن و بونده‌ی بیانات ریجه‌سی خبرچیلرنینگ آره‌سیده جدی خواطر توغدیره‌دی.
هرات حاکمی سوزلاوچیسی جیلانی فرهاد، بو بیانات‌نی قانون گه قرشی بیلیب ایتیشیچه، هیچ بیر کیشی‌نینگ اوز شخصی توشونچه‌سینی میدیا و خبرچیلرنینگ اوستیگه تحمیل قیلیش‌گه حقی یوق دیر.
شونینگدیک، مدنی ایش بیلرمانلرنینگ ایشانچی گه کوره، حکومت بونده‌ی بیانات برابریده عکس‌العمل کورستمه‌گن صورتده، خبرچیلرنینگ جانی خطرده بولیشی ممکن.
