د بامیان ولایت یوشمېر اوسېدونکیو له تېرو دوو ورځو راهیسې د خوړو اعتصاب کړی دی.
ځینو مدني فعالانو او د بامیان اوسېدونکیو په کابل او غزني کې د ملکي وګړو د وژل کېدو په غبرګون کې د ملګرو ملتونو او د بامیان والي د دفترونو مخې ته پرلت پیل کړی دی.
معترضان وايي، له څو کلونو راهیسې هېواد کې ملکي وګړي، په ځانګړي ډول د یو ټبر خلک نښه ګرځي چې باید مخه یې ونیول شي.
یو معترض عبدالله دانشیار وایي، نړېواله ټولنه دې د حقیقتموندنې یو پلاوی افغانستان ته راولېږي چې د ملکي وګړو د مرګژوبلې په اړه څېړنې وکړي او عاملان یې په ګوته کړي.
یو بل معترض رضا کرماني بیا حکومت په بېکفایتۍ تورنوي او وايي چې د خلکو د امنیت خوندیتوب کې پاتې راغلی دی.
کرماني زیاتوي چې هزارهګان په افغانستان کې د ولسواکۍ قرباني دي.
پرلت کوونکيو چې «موږ مه وژنئ او زموږ غږ واورئ» شعار زمزمه کاوه، له نړېوالې ټولنې او د بشري حقونو ملاتړو بنسټونو وغوښتل چې پر افغان حکومت د فشار راوړلو له لارې، افغانستان کې د ملکي وګړو مرګژوبلې ته د پای ټکی کېږدي.
مدني فعالانو او د بامیان ولایت یوشمېر اوسېدونکیو داسې مهال د خوړو اعتصاب کړی چې ناامنیو په هېواد کې زور اخیستی او په وروستۍ یوه اوونۍ کې لسګونه کسان وژل شوي او ټپیان دي.
