با گذشت سه هفته از فیصله کابینه مبنی بر ثبت دارایی‌های مقام‌های بلندرتبه دولتی به‌شمول اعضای شورای ملی، اداره امور ریاست جمهوری اعلام کرده که فیصله کابینه از سوی شمار زیادی از مقام‌ها جدی گرفته نشده است.
اداره امور ریاست جمهوری با نشر اعلامیه‌یی امروز سه‌شنبه، هفتم اسد، گفته که براساس فیصله کابینه، مقام‌های بلندرتبۀ دولتی به‌شمول نماینده‌گان شورای ملی مکلف بودند که تا ششم اسد، دارایی‌های‌شان را در ریاست ثبت دارایی‌های ریاست عمومی اداره امور ریاست‌جمهوری ثبت کنند.
به گفته اداره امور ریاست جمهوری، این کار تا هنوز از سوی مقامات دولتی انجام نشده است.
صدیق صدیقی، سخنگوی ریاست جمهوری روز دوشنبه، شانزدهم سرطان، در یک نشست خبری در کابل گفته بود که کابینه در نشست این هفته خود فیصله کرده تا تمامی اعضای کابینه، والیان، اعضای شورای ملی و کارمندان بلندپایه دولتی در سه هفته آینده دارایی‌های‌شان را ثبت کنند.
اداره امور ریاست جمهوری برای کارمندان بلندپایۀ دولتی تا سیزدهم ماه اسد سال روان مهلت داده تا دارایی‌های‌شان را ثبت کنند.
پیش‌تر سخنگوی ریاست جمهوری پیش‌تر گفته بود، در صورت عدم تکمیل این روند، به وزارت مالیه هدایت داده شده تا معاشات کارمندانی را که دارایی خود را ثبت نکرده‌اند، قطع کند.
اداره امور ریاست جمهوری گفته که پس از ختم مهلت داده شده – سیزدهم ماه جاری – اگر کارمندان بلندرتبۀ دولتی دارایی‌های‌شان را ثبت نکردند، نام‌های‌شان همه‌گانی می‌شود.
