بوگون "سه‌شنبه" آسیا بنیادی‌نینگ مسووللری کابلده بیر خبری ییغین آرقه‌لی ینگی بیر تیکشیریش نتیجه‌سی‌نی ترقه‌تگن‌لر. اوشبو تیکشیریش‌گه کوره، افغانستان یشاوچی‌لریدن 33% مملکت کیله‌جگی‌گه امیدوارلر و باشقه 60% نینگ ایتیشیچه، افغانستان ناتوغری یول‌گه کیتماقده.
افغانستانده آسیا بنیادی‌نینگ باشلیغی عبدالله احمدزی‌نینگ ایتیشیچه، مملکت 34 ولایتیده 15000 کیشی‌دن خوفسیزلیک، اقتصاد، کینگی‌تیریش، یخشی حکومت‌دارلیک، سیاسی مشارکت، معلومات لرگه قول تاپیش، قاچقین‌لیک و عیاللرگه تیگیشلی بولگن موضوع‌لر خصوصیده سوره‌لگن.
جناب احمدزی‌نینگ ایتیشیچه، مذکور تیکشیریش‌گه کوره، اهالی‌نینگ قورالی قرشی گروه‌لر خصوصیده بولگن ایشانچ‌لری کمه‌یگن و یشاوچی‌لردن 60% مملکت کیله‌جگی اوچون ناامید دیرلر.
افغانستانده آسیا بنیادی‌نینگ استراتژیک باشلیغی فضل‌ربی‌نینگ ایتیشیچه، تیکشیریش‌ده اشتراک قیلگنلردن 78% مملکت شمال‌غربی‌ده طالب‌لرنی کته تهدید عنوان قیله‌دیلر و مملکت شرقی‌ده 57% اشتراک قیلگن‌لر داعش‌نی کته تهدید بیله‌دیلر.
آسیا بنیادی‌نینگ تیکشیریشی‌گه کوره، اهالی‌نینگ دموکراسی، سیلاولر، دولتی نهادلر و خذمت‌لر خصوصیده بولگن اعتمادلری کوپه‌یگن. بیراق ناتینچلیک و اقتصادی وضعیت‌نینگ یمان بولیشی، شونینگ‌دیک نماینده‌لر کینگشی سیلاوی‌نینگ کینگه قالیشی اولرنینگ فکرلریگه منفی تاثیر قویگن.
