طالبلر رهبری ملا اخترمحمدمنصور امریکانینگ اوچوچیسی بولمهگن حربی اوچاغی تامانیدن بلوچستانده قتل ایتیلیشیدن بیر هفته اوتر اوتمس مذکور حرکت اوزیگه ینگی رهبر تعیینلهدی. طالبلر رهبریتی کینگشی ملا منصور معاونی صفتیده فعالیت آلیب بارگن مولوی هبت الله آخوند زادهنی طالباننینگ ینگی رهبریتی مقامیگه کوترگن. طالبلر حرکتی تاسیس ایتیلگنیدن بیری مذکور گروهنینگ تنیقلی سیمالریدن بیری سنلگن مولوی هبت الله طالبان حرکتیده کوپراق قضا ایشلری بیلن شغللنگن. جنگ و سیاست ساحهسیده لازم تجربهگه ایگه بولمهگن.
ملا منصور اولیمی و اونینگ اورنیگه مولوی هبت الله تعیین لنگنی تورلی عکسالعمللر بیلن روپه ره بولگن. افغانستان دولتی ملا منصور اولیمی نی، طالبلر نی کوپراق ضعیف لشتیریشینی تاکیدلهیدی. رسمی کابل هبت الله آخوند زادهنی طالبلر مشکلینی رسمی کابل بیلن تینچ یوللر آرقلی برطرف ایتیش لیککه چقیریب، عکس حالده، اونی هم ملا اختر محمد منصور تقدیری گه دوچ کیلیشی بارهسیده آگاهلنتیرگن.
ناتو رسمیلری و افغانستان تینچلیک عالی کینگشی اعضالری منصور اولیمینی افغانستانده تینچلیک مذاکرهلریگه یول آچیب بیریشینی بیلدیرگنلر.
عین حالده، باراک اوباما ماموریتی هم طالباننینگ ینگی رهبریتینی تینچلیک مذاکرهلریده اشتراک ایتیش لیککه دعوت ایتگن. امریکا تشقی ایشلر وزیرلیگی سوزلاوچیسی مارک تونر طالبلرنینگ ینگی رهبریتیدن تینچلیک جریانیگه قوشیلیشینی سوره گن. او، تینچلیک جریانیگه قوشیلمهگنلرنی ملا اختر منصور کبی نابود ایتیلیشینی بیلدیرگن. مولوی هبتالله نینگ آتی امریکانینگ ترورچیلر قاره رویخطیده بولمهگنی ایتیلهدی. طالبان نینگ ینگی رهبریتی رسمی واشنگتن چقیریغی گه هلی گچه عکسالعمل بیلدیرمه گن.
ملا منصور نینگ اولیمی طالبلر صفلریگه قندهی تاثیر اوتکزیشی ممکن؟
رسمی کابل ملا منصورنینگ هلاکتی همده مولوی هبتاللهنی طالباننینگ ینگی رهبری صفتیده تعیین ایتیلگنی اوشبو گروهنی تاباره پرچهلنیشیگه آلیب کیلیشیگه ایشانهدی. حکومت رسمیلری بیر قطار جنگری طالبلر واولرنینگ قوماندانلرینی مولوی هبت الله رهبریتینی قبول ایتمهی اونگه بویین سونمسلیگیگه ایشانهدیلر.
ملا اختر منصور اولیمی طالبلر اوچون ایکّی مهم پیغامی بار. بیرینچیسی طالبلر رهبرلری دنیانینگ هیچ بیر ییریده ترورچیلیککه قرشی ائتلاف نظریدن چیتده قالالمهیدیلر. باشقه بیر عباره بیلن ایتگنده طالبلر رهبرلرینی امریکا و اونینگ شریکلری هر ییرده نشانگه آلیب نابود ایتیشلری ممکن. ایکینچی پیغامی ایسه طالباننی اوز حامیلری یعنی پاکستانگه کوپ ایشانمسلیک لری لازم لیگیدن عبارت.
طالبلر حرکتی گه قرهشلی اچیق حقیقت بوندن عبارت که، اولر قوشنی دولت پاکستان خوفسیزلیک خذمتی اختیاریدهگی بیر جنگری گروهدن بولک نرسه ایمسلر. طالبلر بوکونگهچه هم پاکستان منفعتلری اوچون جنگ میدانلریده سؤ استعمال ایتیلیب کیلیلنماقده. و بوندن بو یان هم مذکور گروهنی نا معلوم مدتگه قدر پاکستان منفعتلری اوچون قربان بوله بیریشلری ممکن.
ملا اختر منصور هلاکتی و مولوی هبت اللهنی طالبان نینگ ینگی رهبری ایتیب تعیین لنیشی، طالبلر صفلرینی ضعیفلشیشیگه آلیب کیلمهیدی. نیگه دیگنده؛ طالبلر ادارهسی پاکستان جاسوسلیک خذمتی قولیده بولیب مذکور حرکتنینگ سیاسی و حربی فعالیتلری آ اس آی همده پاکستان اردوسی تامانیدن باشقریلهدی. طالبلر و باشقه ترورچی گروهلر فعالیتی اصلیده اولرنینگ بیرینچی رهبرلری ایمس بلکه، ایکینچی و اوچینچی قدم لردهگی مهرهلری تامانیدن رهبرلیک ایتیلهدی.
ملا منصور هلاکتی شونینگ مولوی هبت الله آخوند زاده نی طالباننینگ ینگی رهبری ایتیب تعیینلنگنی افغانستان ایچکریسیده طالبلر فعالیتیگه سیره تاثیر اوتکزمهگن. چهارشنبه کونی کابل ولایتینینگ پغمان تومنیده میدان وردک ولایتینینگ محکمه ادارهسی ایشچیلری اتوبوسیگه قرشی اویوشتیریلگن مدهش پارتلشده مذکور ادارهنینگ کمیده اون بیر خادمی نابود بولدی. شونینگدیک افغانستاننینگ ایریم منطقهلریده جنگ جبههلریده بیران بیر جدی اوزگریش کوزهتیلمهگن.
طالباننی ضعیفلشتیریش اوچون اولرنینگ رهبرلریگه ضربه بیریش و یا هم اولرنی یوق قیلیش ایجابی نتیجه آلیب کیلمهیدی. در حقیقت طالباننی کوچسیزلنتیریش اوچون بیرینچیدن اولرنی هر تامانلمه حمایت ایتیب کیله دیگن باش قرارگاهلرینی نابود ایتیش کیرهک. اوشبو مقصدگه رسمی اسلام آباد همکارلیگیسیز ایریشیش ممکن ایمس البته.
چونکه پاکستان افغانستان ایچکریسیده اوروشه دیگن جنگری طالبلرنی اوزلوکسیز روشده حمایت ایتیب، اونی قوشیمچه ترورچیلر ، پول و حربی امکانلر بیلن حمایت ایتهدی. دنیا نینگ ییریک دولتلری جملهدن امریکا قوشمه ایلاتلری و ناتوگه اعضا دولتلر همده چین و روسیه بیرگهلیکده پاکستانگه قرشی اوزلوکسیز باسیملر اوتکزمه گن تقدیرده، افغانستانده نا برقرار وضعیت نا معلوم مدت گهچه دوام ایته بیرهدی. خلق ارا ترورچیلر افغانستان ایچکریسیده گناهسیز انسانلر و ملی خوفسیزلیک کوچلری حربینی قربان ایته بیرهدی.
امریکانی طالبلر رهبرلرینی نشانگه آلیب اولرنی نابود ایتیش اوچون کورسته دیگن عزمیگه ایشانه بیرسه بولهمی؟ ایکینچی سوراق: ملا اختر منصور روسیه نمایندهلری بیلن ایران و باشقه یورتلرده اوچرهشمه گنیده امریکا حربی اوچاقلری تامانلری بیلن نشانگه آلینر میدی؟
