شماری از شهروندان بامیان، امروز به خیابان‌ها آمده و با شعارهای «حکومت حکومت، خجالت خجالت»، سران حکومت وحدت ملی را در راستای تأمین امنیت شهروندان به بی‌توجهی و بی‌مسؤلیتی متهم کرده و کشتارهای اخیر را نظام‌مند می‌خوانند.
آن‌ها می‌گویند که کشتارهای اخیر غیرنظامیان و نظامیان در غزنی و مرکز آموزشی موعود دشت‌برچی کابل سیستیماتیک بوده است.
معترضان در یک حرکت نمادین اعتراضی، تابوت سران حکومت وحدت ملی را به خاک سپردند.
عبدالله دانشیار یکی از معترضان، سران حکومت را به بی‌کفایتی و رفتار فاشیستی متهم کرده می‌گوید که امروز به خیابان آمده تا در برابر بی‌تفاوتی سران حکومت اعتراض کند.
به گفتۀ دانشیار مردم دیگر از نسل‌کشی، انتحار و دفن پیکرهای عزیزان خود خسته شده‌اند.
زهرا کاظمی یکی دیگر از معترضان، نیز حکومت را به بی‌کفایتی و بی‌برنامه‌گی متهم کرده می‌گوید که جرم دانش آموزان چیست که باید کشته شوند.
به گفتۀ کاظمی، سران حکومت و نهادهای امنیتی وقتی توانایی ادای مسئولیت خود را ندارند، باید استعفا بدهند.
معترضان با خواندن قطعنامهٔ سه ماده‌یی از حکومت می‌خواهند تا امنیت جان و مال شهروندان را تأمین کند.
آن‌ها از جامعۀ جهانی نیز می‌خواهند تا جلوی کشتارهای نظام‌مند کنونی را در افغانستان بگیرند.
