د روسیې د بهرنیو چارو وزیر سرګي لاوروف د شانګهای سازمان د غړیو هېوادونو په ناسته کې وویل، مسکو چمتو دی چې له افغانستان سره د نشه يي توکو او د امنیت د ښه والي په برخه کې مرسته وکړي.
د روسیې د بهرنیو چارو وزیر دغه څرګندونې په مسکو کې د شانګهای غړیو هېوادونو د ملي امنیت د سلاکارانو په ناسته کې جوړې شوې غونډې ته وکړې.
سرګي لاوروف د افغانستان د ملي امنیت سلاکار حنیف اتمر سره په لیدنه کې وویل، چمتو دي چې د افغانستان سره د نشه یي توکو د قاچاق په مخنیوي او د امنیت راوستو په برخه کې مرستې وکړي.
د راپورونو پر بنسټ د ملي امنیت سلاکار محمد حنیف اتمر د شانګهای د همکارۍ سازمان د غونډې ترڅنګ تیره ورځ د روسیې د بهرنیو چارو له وزیرسرګي لاوروف سره په مسکو کې وکتل.
اتمر د افغانستان د ملي امنیت سلاکار ته وویل، دی د افغان ولسمشر پېغام راوړی او جمهور رییس ورته ويلي، چې افغانستان له روسيې سره د اړيکو پراختيا غواړي.
ده زیاته کړه، چې د دواړو هېوادونو ترمنځ په ځانګړې توګه په دفاعي برخه کې مرستې مهمې او اړینې دي.
اخوا د روسیي ولسمشر ولاديمیر پوتین ویلي، چې په سیمه او افغانستان کې د نا امنیو له زیاتېدو څخه اندېښنه لري.
نوموړي ويلي، چې په سیمه کې د نشه یي توکو سره په مبارزه او ناامنیو د مخنیوي په برخه کې هر اړخیزو مرستو ته چمتو دي.
روسيه په اسیا کې د پياوړو هېوادونو په قطار کې شمېرل کيږي، چې د سياسي او مفکوروي له پلوه د نړۍ پياوړي امريکا سره سخت رقابت لري.
له دې وړاندې د پخواني ولسمشر حامد کرزي پر مهال کله، چې د افغانستان اړيکې د امريکا سره ترينګلې شوې، نو ولسمشر کرزي روسيې ته مخه کړه او د دغه هېواد څخه يې د نظامي تجهيزاتو د مرستې غوښتونکی شو.
هغه مهال هم روسيه افغانستان د هر راز پوځي مرستو کولو له پاره چمتو والی ښودلی و.
