بوگون «یکشنبه» مزارشریف یشاوچی‌لریدن اونلرچه‌سی سونگی بیر آی ایچیده 8 کیشی هلاک بولگنی، سِرلی قتل رقمی کوپه‌یگنی، آدم اوغیرلاوچیلیک و یوللرده‌گی اوغیرلاوچیلیک‌لر کوپه‌یگنی باعث، احمدشاه مسعود تورت یولیده ناراضلیک نمایش یولگه قویگن‌لر.
اوتگن هفته سِرلی شکلده اولدیریلگن انجنیر حشمت‌الله نینگ آته‌سی عبیدالله سیار ناراضلیک نمایش‌گه اشتراک قیلیب ایتیشیچه، اوغلی کیچه تاماندن ایچیم‌لیک آلیش اوچون اویی‌دن تشقری چیققن، بیراق اونینگ جسدی‌نی ایکی کیچه-کوندوز اوتگنیدن سونگ، 7- پولیس حوزه‌سیدن تاپگن‌لر.
ناراضلیک نمایش‌گه اشتراک قیلگن مزارشریف یشاوچی‌لریدن ماجان‌اعظمی و شبنم محمدی‌نینگ ایتیشیچه، بیر لحظه هم اوزلرینی تینچ حس قیلمه‌یدیلر. اوغیرلاوچیلیک و ترورچیلیک حادثه‌لری کوپه‌یگنی اولرنینگ خواطرگه سالگن.
عین حالده، بلخ پولیسی‌نینگ سوزلاوچیسی شیرجان درانی، جنایی جرملر کوپه‌یگنینی تصدیق‌لب و بو جرملرنینگ عاملی قولگه آلینیشی توغریسیده سعی و حرکت دوام ایته‌یاتگنیدن خبر بیره‌دی.
جمهورلیک ریاستی و عطامحمد نور آره‌سیده قره‌مه قرشی‌لیک‌لر کوپه‌یگنیدن سونگ، مزار شریف‌ده جنایی جرم‌لری میزانی آشگن و عین حالده، ولایت اوچون ینگی حاکم و پولیس قومندانلیگی اوچون ینگی قومندان تعیین ایتیلیشی جنایی جرملر رقمی کمه‌ییشی توغریسیده هیچ قنده‌ی تأثیر تشلمه‌گن.
