مرکزی بانک مسوول‌لری‌نینگ ایتیشیچه، دالر برابریده افغانی پول بهاسی کمه‌ییشی وقتینچه‌لیک دیر و تیزلیکده کوتاریله‌دی.
سونگی کونلرده دالر بهاسی افغانی پول برابریده کوپیگن و هر دالر 62 افغانی و 20 پول‌گه ییتیشگن.
یکشنبه کونی، مرکزی بانک اورین باسری عیسی‌خان تراب‌نینگ سلام‌وطندارگه ایتیشیچه، دالر بهاسی نه فقط افغانستان‌ده بلکیم منطقه مملکت‌لریده هم کوپیگن.
جناب تراب، دالر بهاسی افغانی پول برابریده یوقاری کیتگنینی وقتینچه‌لیک بیلیب ایتیشیچه، اوتکن ییل‌لرده‌هم شونده‌ی بیر زمانده، دالر بهاسی افغانی پول برابریده یوقاری کیتگن ایدی.
او، دالر بهاسی افغانی پول برابریده کوپیگن دلیلی‌نی ایش‌سیزلیک و ایش‌خانه‌لر فعال سیزلیگی دیب بیله‌دی.
اقتصادی ایش بیلرمان ولی آذرخش حافظی، دالر بهاسی کوپه‌ییش دلیلی‌نی یاردم بیروچی تشقی مملکت‌لر یاردمی کیسیلگی دیب بیله‌دی.
جناب حافظی‌گه کوره، صنعی اقتصادنی اوزاق‌لشتیریش و حقیقی اقتصادنی مستحکم لشتیریش، اوشبو چیگل‌لیک‌دن چیقه‌دیگن یول دیر.
اونینگ ایتیشیچه، افغانستان ایش کوچی، آقیب یورگن سوولر و کان‌لریدن ایش آلیشی کیره‌ک و خالص ایشلب چیقاریشینی ایکی- اوچ برابر کوپیتیریب و اونی یانیده، صادرات و واردات ترازوسی‌نی برابر قیلیشی لازم.
عین حالده، شهزاده سرایی صراف‌لریدن بیرقطاری، دالر بهاسی کوپیگنینی ناتینچ‌لیک‌لر و حکومت دقت سیزلیگی‌گه نسبت بیره‌دی.
اولرنینگ ایتیشیچه، افغانی پول‌گه خلق ایشانچ‌سیزلیگی، دالر بهاسی‌نی کوپیتیرگن و مرکزی بانک‌هم دالر ترقه‌تیش میزانی‌نی کمه‌یتیرگن.
شهزاده سرایی صراف‌لری‌گه کوره، اوتمیش‌لرده مرکزی بانک هفته‌ده ایکی مرته بازارده دالر ترقه‌تر ایدی، بیراق حاضر بو ایش هفته‌ده بیر مرته بوله‌دی.
عین حالده، اقتصادی ایش بیلرمان‌لرنینگ ایشانچی‌گه کوره، افغانی پول برابریده دالر بهاسی کوپه‌ییش زیانی مملکت تینچ اهالیسی تول‌له‌یدی؛ چونکه دالر بهاسی کوپیگن صورتده، وارداتی نرسه‌لر بهاسی‌هم یوقاری کوتاریله‌دی.
اوشبو ایش بیلرمان‌لرگه کوره، مملکت صادراتی و ایشلب چیقاریش میزانی کوپیتیریلمسه، افغانی پول‌گه حقیقی ارزش بیریلمه‌یدی.
افغانی پول بهاسی دالر برابریده کمه‌ییشی اوتکن ییل‌دن بویان تینگ بولیب کیلگن.
