مسؤولان ریاست معارف/آموزش و پرورش ولایت بلخ، نماینده‌های مردم در شورای ولایتی را متهم به مداخله در امور کاری ریاست معارف کرده می‌گویند که این نماینده‌گان حتا در استخدام آموزگاران دخالت کرده و از نفوذشان برای تعیین و جابه‌جایی بسته‌گان‌شان استفاده می‌کنند.
به گفتۀ آنان، فشارهای بی‌موجب اعضای شورای ولایتی بلخ، معارف این ولایت را با مشکلات زیادی دچار کرده است.
عبدالعزیز عزیز، رییس معارف ولایت بلخ می‌گوید، داوطلبانی که در رقابت‌ها و آزمون پذیرش ناکام می‌مانند به واسطه و کمک نماینده‌گان شورای ولایتی وارد نظام معارف می‌شوند. او می‌گوید، آنان شاهد مواردی بوده‌اند که به هدف جابه‌جایی یک آموزگار، چندین نماینده همزمان به این ریاست هجوم آورده‌اند.
اما مسؤولان شورای ولایتی بلخ می‌گویند، هم‌اکنون ریاست معارف بلخ با ضعف مدیریتی روبه‌روست و عمل‌کرد ضعیف مسؤولان سبب بحران در این ریاست شده است.
محمدافضل حدید، رییس شورای ولایتی بلخ، با تأیید مداخلۀ شماری از نماینده‌گان می‌گوید که نماینده‌گان به علت بحران فعلی که در ریاست معارف بلخ موج می‌زند، ناگزیر به مداخله شده‌اند. او می‌گوید که رییس معارف بلخ توان مدیریت این ریاست را ندارد.
پیش از این ریاست معارف بلخ آزمونی را به هدف جذب آموزگاران جوان برگزار کرد که در آن نزدیک به 2 هزار داوطلب اشتراک کرده بود. اما ظرفیت پذیرش آن کم‌تر از نصف این داوطلبان بود.
ضعف در مدیریت و مداخلۀ افراد زورمند در نهادهای حکومتی از چالش‌های‌ست که همواره سبب رشد فساد و کم‌کاری شده است.
