کابل یشاوچیلری‌نینگ کینگ ناراضیلیک نمایش‌لری دوامی‌ده مجلس حکومت و کابل اعتراضچی‌لری آره‌سیده مذاکره اوتکزیش نیتی‌ده مملکت بویلب برچه ولایت‌لرنینگ نماینده‌لریدن 34 کیشی‌لیک بیر هیأت تعیین قیلیش‌گه قرار قیلدی و مجلس‌نینگ بو قراری کوپینچه آواز بیلن تصدیق‌لندی.
مجلس‌نینگ اورغولشیچه، مملکت‌نینگ حاضرگی وضعیتی چیگل دیر و اعتراضچی‌لر حکومت بیلن کیلیشیشی لازم.
مجلس اعضاسی فوزیه نصرت‌نینگ ایتیشیچه، حاضرگی قیین‌چیلیک‌لرگه نقطه قوییش اولرنینگ وظیفه‌سی دیر. اونگه کوره، کابل‌ده یوز بیرگن سونگی واقعه‌لر، بوتون باشکینت اهالیسی‌نی قیغو و اَلم‌گه اولتیرغیزگن.
مجلس باشلیغی عبدالرووف ابراهیمی‌نینگ ایتیشیچه، مملکت‌ده‌گی حاضرگی قیین‌چیلیک‌لر خصوصیده، ایلچی خانه‌لر، یوناما بیلن صحبت قیلیش و شونینگ‌دیک، حاضرگی قیین‌چیلیک‌دن چیقیش توغریسیده ییچیم یول تاپیش، مذکور هیأت‌نینگ مسؤولیتی دیر.
جناب ابراهیمی، برچه ولایت‌لرنینگ نماینده‌لریدن مذکور هیأت اعضالیگی اوچون ایچلریدن بیرینی تانیشتیریشی‌نی سوره‌دی.
دیمک، سونگی نیچه کونده مملکت باشکینتی‌ده نیچه قانلی واقعه یوز بیردی. اوتگن هفته «چهارشنبه» کون یوز بیرگن ترورچیلیک هجوم‌ده اونلرچه کیشی هلاک و یوزلرچه کیشی یره‌لندی. «جمعه» کون امنیتی کوچلر تامانیدن اعتراضچی‌لرگه قرشی آتیلگن اوقلر نتیجه‌سیده، نیچه کیشی هلاک و نیچه کیشی یره‌لندی و شونینگ‌دیک، «شنبه» کون سنامجلسی‌نینگ اورین باسری محمدعلم ایزدیارنینگ اوغلی سالم ایزدیارنینگ جنازه مراسمی‌ده یوز بیرگن کیین‌مه کیین اوچ خودکش هجوم‌ده بیر قطار کیشی هلاک و باشقه بیر قطاری کیشی یره‌لنگن.
اوشبو واقعه‌لر حکومت‌گه قرشی کابل، هرات، بغلان، بلخ، تخار و قندوز ولایت‌لری یشاوچیلری‌نینگ ناراضیلیک‌لریگه سبب بولدی و اعتراضچی‌لر ایسه، جمهور رییس، اجراییه باشلیغی و امنیتی ییریک رسمی‌لر وظیفه‌لریدن چیکله‌نیش‌لرینی سوره‌گن‌لر.
