افغانستان جمهور رئیسی محمداشرف غنی، جمهورلیک ریاستی نینگ سابق بیرینچی اورین باسری جنرال عبدالرشید دوستم گه مارشاللیک رتبهسی بیریلگن فرمان نی امضالهدی.
افغانستان ملی مصالحه یوکسک کینگشی بیرینچی اورین باسری عنایتالله بابر فرهمند، جمهور رئیس فرمانی دن بیر نسخهسینی اوز توییتر صحیفهسیده نشر قیلگن.
مملکت جمهور رئیسی محمداشرف غنی اوشبو فرمان نی جاری ییل، 21- جوزا ده امضا قیلگن.
جمهورلیک ریاستی نینگ فرمانی ده کیلیشیچه: «افغانستان اساسی قانونی نینگ 64- مادهسی و 19- بندی اساسیده، مملکت نینگ سیاسی شخصیتی حرمتلی عبدالرشید دوستم گه مملکت ده تینچلیک و برقرارلیک تأمینلنیشی و سیاسی قیینچیلیکلر حل ایتیلیشی خصوصیده قیلگن خذمتلرینی حرمتی گه مارشاللیک رتبهسی بیریلگن.»
قویاش 1399- ییل، ثور آیی ده جمهور رئیس غنی و عبدالله عبدالله نینگ آرهسیده امضالنگن سیاسی کیلیشوونامه اساسیده، جمهور رئیس غنی نینگ فرمانی بیلن جنرال عبدالرشید دوستم گه مارشاللیک رتبهسی بیریلیب و ملی خوفسیزلیک کینگشی بیلن دولت عالی کینگشی گه اعضا بولیشی بیلدیریلگن.
مارشال عبدالرشید دوستم افغانستان نینگ اوچینچی مارشالی دیر.
افغانستان نینگ بیرینچی مارشالی شاهولی خان بولگن و او، حبیبالله کلکانی نینگ کوچلریدن کابل نی آلگنی اوچون مارشاللیک مقامی گه ایریشگن.
شونینگدیک، اوندن کیین ایکینچی مارشاللیک مملکت ملی «قهرمانی»، طالبان گه قرشی بیرلشمه جبهه قومندانی و سابق مدافعه وزیر احمدشاه مسعودنینگ اورین باسری محمدقسیم فهیم گه سابق جمهور رئیس حامد کرزی تامانیدن بیریلگن ایدی.