د لوګر روغتيايي مسوولان وايي چې يوازې د لوګر مرکزي روغتون ته په یوه اوونۍ کې ۳۰۰ په سینهبغل ناروغۍ اخته ماشومان ور وړل شويدي چې لسګونه یې اوسمهال په مرکزي روغتون کې تر درملنې لاندې دي.
د لوګر د مرکزې روغتون یو ډاکتر محمد صدیق سلام وطندار ته وویل چې د پخوا په پرتله د دې ناروغې کچه لوړه شوې او حتا په مرکزي روغتون کې د ځای د نهشتوالي له امله ډېر ماشومان نورو روغتونو ته لېږدول شويدي.
ښاغلي ستانکزي زیاته کړه، که پهدې اړه د روغتیا وزارت لاس په کار نهشي؛ لېرې نهده چې په لوګر ولایت کې به ګڼ شمېر ماشومان خپل ژوند له لاسه ورکړي.
بلهخوا د لوګر د عامې روغتیا رییس رسولګل ثمر هم پهدې ولایت کې د ماشومانو د سینهبغل ناروغۍ زیاتوالی مني؛ خو وايي، تراوسه د دې ناروغۍ رسمي ارقام په لاس کې نهلري چې پهدې ولایت کې څومره ماشومان په سینهبغل ناروغۍ اخته شويدي.
په ورته وخت کې د نایب امینالله خان لوګري روغتون د یو شمیر ناروغانو پیوازان وایي چې د پخوا په پرتله یې په سیمو کې د سینهبغل ناروغي دوه برابره ډېره شوې؛ خو په وینا یې، په لوګر کې د درملنې لهپاره مناسب روغتون نهشته.
دوی زیاتوي، اوسمهال د لوګر په مرکزي روغتون کې د زیاتو ناروغانو له امله په یو بستر کې تر درېیوو پورې ناروغان بستر شوېدي.
په لوګر کې د ماشومانو د ناروغيو د برخې يو ډاکټر محمداسماعیل سلام وطندار ته د دې ناروغۍ د ډېرېدو د مخنيوي لهپاره د ماشومانو ګرم او له نورو هغو څخه لېرې ساتل اړین وبلل.
هغه زياته کړه، که ماشومان له سړې هوا، لوګي او ګردونو وساتل شي؛ د دې ناروغۍ د خپرېدو په مخنيوي کې ډېره مرسته کوي.
په افغانستان کې ککړه او سړه هوا او د نویو زېږېدلو ماشومانو د پالنې په اړه لږ پوهاوی، په سینهبغل د ماشومانو د اخته کېدو لوی لاملونه ګڼل شويدي.
