له کندهار ولایت نه پاکستان هېواد ته د ۵۷۲۳ ټنو انګورو په صادرېدلو سره د دغه ولایت اوسېدونکیو ته یو میلیون، یو سلو او نږدې ۱۰۰ زره امریکايي ډالره عواید لاس ته ورغلي دي.
د کندهار د سوداګرۍ خونې مرستیال انجنیر عبدالباقي بینا نن سه شنبه د (نومبر پر ۲۲مه) سلام وطندار ته وویل، سږکال د کندهار د انګورو محصولات ډېر ښه وو؛ خو که چېرې د انګورو د صادراتو پر مهال پاکستان د سپین بولدک ولسوالۍ سره نږدې فرضي کرښه نه وی تړلی؛ دا صادرات به دوه چنده وی.
د انګورو د موسم پر وخت د پاکستاني پولیسو له خوا د سپین بولدک په سیمه کې د ۲۰ ورځو له پاره پر فرضي کرښې د تګ ـ راتګ لاره تړل شوې وه، چې کندهاري سوداګرو ته یې په میلیونونو افغانۍ زیان واړولو.
بینا زیاتوي، دا مهال یوازې پاکستان ته د انګورو صادرات لري او په دې لټه کې دي، چې نورو هېوادونو ته د هوا له لارې صادرات پیل کړي.
د کندهار د لندې مېوې د کمېسیون مشر حاجي ناني هم سلام وطندارته وویل، که اړوندې دولتې ادارې په دې ولایت کې سړې خونې جوړې کړې وی؛ ښايي سوداګرو دومره زیات تاون نه وی کړی.
د ده په خبره، اوس د سختې مجبورۍ له امله خپله تازه مېوه په پاکستانیو سړو خونو کې ساتي.
حاجي نانی همدارنګه وايي، نورو هېوادونو ته د الوتکو د لوړ محصول له امله صادرات نه شي کولی او که يې وکړي؛ نو هلته بیا ګټه نه شي کولی، بلکې سوداګریز مالونه ورته په تاوان تمامېږي.
نوموړی د کندهاري سوداګرو په استازیتوب وايي، که دولت ورسره مرسته وکړي، چې خپل سوداګریز محصولات د هوا له لارې نورو هېوادونو ته ولېږدوي؛ نو د پاکستان پر ځای به نړیوالو مارکېټونو ته لاره پیدا کړي او هر کال به يې انګور له خرابوالي خلاص شي.
د کندهار د سوداګرۍ خونې مسوولان وايي، له ۱۳۸۷ لمریز کال راهیسې هڅه کوي، چي د کندهاري انګورو له پاره ارزانه هوايي ټرانسپورټ پیدا کړي؛ خو تر اوسه نه دي توانېدلي.
د کندهار د سوداګرۍ خوني مرستیال انجنیرعبدالباقي بینا زیاتوي، هر کال د تازه مېوې د صادراتو څخه دوې میاشتې مخکې په کندهار کې د پاکستان له کونسلګرۍ سره خبرې کوي، هغوی ژمنه ورکوي؛ خو د صادراتو پر مهال بیا یوه ستونزه راپيدا شي.
د کندهار د سوداګرۍ خونې د مسوولانو په خبره، سږکال يې په افغانستان کې د پاکستان له سفیر سره هم دا ستونزه شریکه کړې او ورته ویلي یې دي، چې د صادراتو او وارداتو د لېږد په اړه له پاکستان سره د دایمې حل په پار خبرې وکړي.
