د عدلیې وزارت چارواکي وايي، د ښځو او ماشومانو د ځورونې مخنیوي قانون پر بنسټ به، د کار او ټولنیزو چارو وزارت په مشرۍ د ښځو او ماشومانو د ځورونې د مخنیوي عالي کمېسیون جوړ شي.
د عدلیې وزارت ویاند امان ریاضت نن کابل کې د ښځو او ماشومانو د ځورونې نه د مخنیوي او د ودونو مراسمو قانون د خپرولو په غونډې کې وویل چې دا کمېسیون د نوي قانون لهمخې د کار او ټولنیزو چارو وزارت او یو شمېر نورو دولتي بنسټونو په مشرۍ جوړېږي.
د ښاغلي ریاضت په وینا، د دغه قانون موخه د تاوتریخوالي له قربانیانو ملاتړ، د کار خوندي چاپېریال رامنځته کول، ښوونه او روزنه او له ځورولو پرته روغتیايي خدمتونو ته د ښځو او ماشومانو لاسرسی دی.
د دغه قانون پر بنسټ، د ځورونې قربانیان یا استازي پولیسو، محکمې او ولایتي او د لسوالیو شوراګانو ته شکایت کولی شي.
دولتي ادارو کې د ښځو ځورولو پېښو ته، د ځورولو مخنیوي کمېټو له لوري لاسرسی کېږي.
ښاغلی ریاضت زیاتوي، د ښځو او ماشومانو له ځورونې د مخنیوي قانون په نافذو سره، د ښځو او ماشومانو ځورولو مخنیوي مقرره او د ښځو او ماشومانو په ځورولو پورې اړوندې قانوني مادې لغوه شويدي.
د ښځو او ماشومانو د ځورولو مخنیوي قانون کې د بدن لمسول، نامشروع غوښتنه، ژبنۍ او غیرژبنۍ ځورونې، هر هغه عمل چې جسم ته زیان رسوي او د ښځو او ماشومانو انساني کرامت ته سپکاوی، ځورونه شمېرل شوی او مرتکبینو ته یې سزا اورول شوېده.
د عدلیې وزارت د چارواکیو په وینا، د اساسي قانون د ۲۴مې او ۵۴مې مادو پر بنسټ، د ښځو او ماشومانو د ځورونې مخنیوي قانون ۳ څپرکیو او ۲۹ مادو کې جوړ شویدی.
