-ایکّی کون برون بیر گروه لولی مومجده (قیشلاق) چادر تیکدی. تغین شولرنی ایته یاتگن بولگن می.
خداداد مومج اطرافیگه روان بولدی. او تیز ـ تیز قاقلب یول باسردی. نیچه جایده بورلیب، گاه ادهشیب- اولاقیب، نهایت اوزاقدن بیر نیچه قاره چادر کوریندی. یقین باریب، اریق یاقهسیده اوخلب یاتگن ایرککنی کوردی نری راقده، چادر آلدیده بیر لولی عیال غلویرده دان ایلردی. عیال خدادادگه سلام بیریب دیدی:
سینگه فال کوریمی؟ مینده ایلان تیشیدن قیلینگن مرجان، ایلک و یانغاقلربار
اونینگ سوزلری خدادادنینگ قولاغیگه کیرمسدن، دیوانه وار سورهدی:
لاله… لالونی کوردینگ می؟ اونینگ قهییرده لیگینی بیلهسن می؟
-فال کورسم ایتیب بیرهمن.
– ایت، مین پولینی تولیمین.
– پولینی بیر، کییین ایتهمن
خداداد قتیق چرچه گن ایدی. چونتگیدن بیر قران آلیب، لولی عیالگه اوزتدی. لولی اونینگ قولیدن اوشلب، یوزگه قرهدی و دیدی :
-حضرت علی پناهینگ بولسین. ای آدم، سینینگ دلینگده حاضر غصه اورنشگن. تورت ییل ارداقلب یورگن بیر عزیز نرسهنی یوقاتیب سن.
او سینینگ جگربندینگ بولسمه ـ ده اۉز جگر پارهنگ ینگلیغ سیوهسن اونی
خداداد کوزلری یاشگه تولدی، لالی گه باقدی و شیورلب دیدی:
-راست، گپلرینگ راست.
-اما بیهودهگه غصه چیکمهگین. زیرا، او قیز سینینگ یقینینگده دیر. او تیریک و ساغ و سلامت.
-قنی او؟ قنده ی کیلیب قالدی بو ییرگه؟ خدا حقی، مینگه همهسینی ایتیب بیر.
-قیغورمه، او قیز بختیاردیر. سین اوینگنی آچیق قالدیردینگ و شیطان کیریب اونی الدهب آلیب کیتدی.
-اونینگ اسمی عباس می؟
-یوق
-سین بولرنینگ برینی قهییردن بیلهسن؟ خدا حقی، راست نی ایت، نیمه خالهسنگ بیرهمن.
او چونتگیدن ینه پول چیقاردی. لیکن شو اسناده قوشینی چادر ایشگیده گی پرده بیر یانگه سوریلیب، اوندن لاله چیقیب کیلدی.
ایگنیده خداداد ساتیب آلیب بیرگن اوشه قیرمیزی کویلک، قولیده بیرته قیزیل آلمه. او آلمهنی یینگی بیلن اریتیب، تیشلهدی- ده، کولیب یوباردی. لاله عیالگه یوزله نیب دیدی:
-آیجان، خداداد آته شو کیشی بولهدی.
خداداد حیرتدن دانگ قاتگنچه لالهگه، آنه سیگه باقردی. او هیچ قچان لالهنی بو قدر خرسند و بختیار حالتده کورمهگن اېدی. او قیزیل رُمالنی قوینیدن آلیب قیزگه قرهب اولاقتیردی و دیدی:
-بونی سینگه آلویدیم
لاله شرهقلب کولیب یوباردی و رُمالنی ییلکهسیگه سالدی- ده، بیر اوچینی سینهسی آستیدن اوتکزیب بالغهدی. سونگره یوگوریب چادر ایچیگه کیردی- ده، اوشه ذهاتی ایچکریدن یاش بیر ییگیتنی باشلب چیقدی.
اونگه پیچیرلب نیمه دیردیدی و خدادادنی کورستدی. شوندن سونگ قیز قوناق آهنگینده خدادادگه تنیش اشولهنی کویله ماققه باشلهدی و ییگیت نینگ ییلکه سیگه قول تشلیب، ایکهلهسی تال زار آرقهسیگه اوتیب کیتدی. لالهنی تیریک تاپگنیدهگی قووانچی یو و اونی ایندی بوتونلی یوقاتگنیدهگی غصه بیر بولیب، خداداد هونگرهب یوباردی. او ییقیله سوریله کیلگن یولیدن آرقهسیگه قیتدی. کلبه سیگه کیریب، ایشیکنی ایچکریدن بیرکیتب آلدی، شوندن سونگ اونی هیچ کیم هیچ قهییرده کورمهدی.
