سلام‌وطندارگه صحبت بیرگن فاریاب پولیس قومندانلیگی سوزلاوچیسی عبدالکریم یورش‌نینگ ایتیشیچه، مذکور ولایت‌نینگ قیصار تومنی قوم بویوک‌لری بیر ییغین یولگه قوییب و نتیجه‌ده فاریاب ولایتیده مردمی کوچلر و قیصار تومنی‌نینگ خوفسیزلیک قومندانی نظام‌الدین قیصاری توتقونگه آلینگن موضوع توغریسیده، حکومت و افغانستان ملی اسلامی جنبش حزبی‌نینگ طرفدارلری آره‌سیده وجودگه کیلگن قیینچیلیکلر حل ایتیلگونگه‌قدر قیصار تومنی‌نینگ خوفسیزلیک قومندانلیگی‌ده عبدالقیوم کوهستانی سرپرست صفتیده تعیین ایتیلیشی توغریسیده قرار قیلینگن.
باشقه تاماندن، ینگی‌لیک‌ده فاریاب ولایتی‌نینگ حاکمی قیلیب تعیین‌لنگن نقیب‌الله فایق، خبری بیر ییغینده میدیالرگه ایتیشیچه، مذکور ولایت‌نینگ قیصار تومنی گه کوماندو کوچلری جایلشتیریلیب و ناقانونی قوراللی کیشی‌لرنینگ آلدی آلینه‌دی و هیچ بیر گروه اوچون قانون گه قرشی حرکت قیلیش‌گه رخصت بیریلمه‌یدی.
بیراق، فاریاب ولایتیده جنبش حزبی‌نینگ ولایتی کینگشی باشلیغی عطامحمد فیضی‌نینگ ایتیشیچه، حکومت قیصار خوفسیزلیک قومندانلیگی اوچون ینگی سرپرست تعیین قیلیب و اهالی آره‌سیده وجودگه کیلگن قیین‌چیلیک‌لرنی کوپه‌یتیره‌دی.
عین حالده، جوزجان ولایتیده جنرال دوستم‌نینگ طرفدارلریدن مینگ‌لرچه‌سی برچه دولتی اداره‌لر، مکتب‌لر، بیلیم یورت‌لر، بانک‌لر و فاریاب، سرپل و بلخ ولایت‌لری‌نینگ قتناو یوللرینی باغلب آگاه‌لنتیریشیچه، دولت اعتراضچی‌لرنینگ مدنی اعتراض‌لریگه ایجابی جواب بیرمه‌گن صورتده، برابریده توخته‌یدیلر.
اولرگه کوره، حکومت، دنیا جماعه‌چیلیگی و انسان حقلری کمیسیونلری، بوندن آرتیق فاریاب ولایتیده جنرال دوستم‌نینگ خاص نماینده‌سی نظام‌الدین قیصاری‌نینگ قوییب یوباریلیشی و جنرال دوستم‌نینگ مملکت‌گه قیتیشی توغریسیده دقت سیزلیک قیلگن صورتده، کابل قتناو یولی‌نی برچه سوداگرلیک بندلر بیلن باغلب و کابل باره‌دیگن برق لینی‌نی کیسه‌دیلر.
اوشبو اعتراضچی‌لردن بیرقطاری، جوزجان ولایتیده‌گی رستورانت‌لردن بیرقطاری‌نینگ شیشه‌لرینی سیندیریب و اولرنینگ ایگه‌لرینی فعالیت قیلگن صورتده، قتیق جزا کوریش‌لری توغریسیده آگاه‌لنتیرگن.
شونینگدیک، افغانستان اوچون ملی قوتقریش ائتلافی و جنرال دوستم‌نینگ طرفدارلریدن مینگ‌لرچه کیشی بلخ، سرپل و سمنگان ولایت‌لریده جاده‌لرگه چیقیب نظام‌الدین قیصاری قوییب یوباریلیشی و جنرال دوستم مملکت‌گه قیتیشی‌نی سوره‌گن‌لر.
اولر، فاریاب‌ده‌گی سونگی تعیینات‌لرگه اشاره قیلیب ایتیشیچه، ارگ مذکور ولایتده اوز آدم‌لرینی تعیین قیلیب و داعش پروژه‌سینی عمل گه آشیره‌دی.
شمالی ولایت‌لرده یولگه قوییلگن ناراضیلیک نمایش‌لر باعث، سرپل، فاریاب و بلخ ولایت‌لری‌نینگ قتناو یوللریده یوزلرچه یوک تاشیووچی موتر بند قالگن.
