افغانستان اوتگن ییل قیش موسومی‌ده اوتمیش‌لردیک قتیق قار و یامغیر یاغیش‌لرگه گواه بولمه‌دی و بو موضوع قوروقچیلیک توغریسیده خواطرلرنی کوپه‌یتیردی.
بوگون نماینده‌لر کینگشی ییغینیده نماینده‌لرنینگ ایتیشیچه، اوتگن قیش موسومی‌ده قار و یامغیر آز یاغگنی باعث، چاروالر اولماققه باشله‌گن و چاروادارلر کوک اوت آزلیگی باعث، چاروالرینی ارزان ساته‌دیلر.
عبدالرحیم رهین‌نینگ ایتیشیچه، قوروقچیلیک‌دن ییتیشه‌دیگن زیانلرنی مدیریت قیلیش اوچون حکومت‌نینگ هیچ بیر برنامه‌سی یوق دیر و شو یوزه‌دن بوتون مملکت‌ده ایکینچی‌لر و چاروادارلر زیان کوره‌دیلر.
نماینده‌لر کینگشی باشلیغی عبدالرؤوف ابراهیمی‌نینگ ایتیشیچه، بو قیین‌چیلیک‌نی نیچه مسؤول رسمی‌لر بیلن شریک قیلگن، بیراق حاضرگچه قانیقرلی جواب آلمه‌گن. نماینده‌لر کینگشی باشلیغی، مذکور قیین‌چیلیک حل ایتیلیشی خصوصیده، ایکینچیلیک وزیرلیگی‌نینگ رسمی‌لری بیلن صحبت قیلیش اوچون بیر کمیسیون تعیین قیلگن.
بوندن آلدین، قوروقچیلیک بولگن صورتده، افغانستان دولتی ترکمنستاندن اوتلاقلرینی افغانستان چاروادارلری‌نینگ اختیاریده قوییشی‌نی ایستردی. شونینگ‌دیک، بو مرته هم نماینده‌لر کینگشی باشلیغی، مسؤوللردن چاروالر اولیمی آلدی آلینیشی اوچون ترکمنستان‌نینگ ییته‌گینی توتیشلرینی سوره‌دی.
شونینگ‌دیک، بوگون وزیرلر کینگشی ییغینیده حکومت اجراییه باشلیغی عبدالله عبدالله قوروقچیلیک‌دن ایسلب و بو توغریده چاره تدبیر کوریلیشی توغریسیده سوز بیردی. اونگه کوره، اوتگن ییل‌گه نسبتن بو ییل افغانستانده قار و یامغیر 30% کمه‌یگن.
