سلاموطندارگه ایتیب کیلگن حجتلرگه کوره، قندوزده «افغان سنترال هند» خصوصی ساغلیک مرکزی جراحلیک رخصت خطی بولمهگن حالده، جراحلیک عملیاتینی قیلهدی و سونگی جاغور عملیاتیده ایکی سینگلی جانیگه ضامن بولگن.
بو ایکی سینگلی عملیات قیلینیشی داخله داکترلری اجازه بیرمسدن بولگن، کوریکلر و اسیستانت بولمسدن عملیات قیلیش نتیجهسیده ایکی سینگلی هم جان بیرگن.
شونینگدیک سلاموطندارگه ایتیب کیلگن حجتلر کورسهتیشیچه، ادعالریگه قرشی مکمل تشکیلات و جهاز لحاظیدن اینگ ضعیف کسلخانه بولگن.
بو ایکی سینگلی ایناغهسی عبدالله نینگ سلاموطندارگه ایتیشیچه، اوشبو ساغلیک مرکزی سینگلی لری کوریکلری تکمیل بولمسدن اولرنی 45 مینگ افغانی اورنیده عملیات قیلیشی بیلن ایکیسی هم عالمدن اوتگن.
او حکومتدن خلق حیاتیگه دقت قیلمهگن و مسلکی داکتری بولمهگن خصوصی کسلخانهلر ایشیگی یاپیشینی سورهگن.
قندوز عامله ساغلیک ریاستی وقتینچه باشلیغی عبدالمتین عاطفی نینگ ایتیشیچه، جاغور کسللیگی تیزدن اولدیره دیگن کسللیکلردن ایمس، بیراق بو ایکی سینگلی کوریکلری تکمیل بولمهگنی و داخله داکتری موافقهسی آلینمسی و ذبیحالله مجیدی ناملی جراح داکتری یخشی کنترول قیلمه گنلیگی سبب جان بیرگنلر.
او، بو ایکی قیز عملیات بولیشدن بیرکون آلدین ساغلیقنی سقلش وزیرلیگی، ولایت داکترلری، ولایتی کنیگش اعضاسی، پولیس و باشقه نهادلردن تیکشیرو گروهی مذکور کسلخانهده باریب، لابراتوری غیر قانونی بولگنلیگی و طبی جهازلری ناتکمیللیگی اوچون بوکسلخانه ایشدن آلینگن ایدی دیدی.
جناب عاطفیگه کوره، بو ایکی قیز اولیمیدن سونگ، اولر اوشبو مرکزنی یاپگنلر.
مذکور مرکزنی تیکشیرویشده اشتراک ایتگن قندوز ولایتی کینگش اعضاسی صفیالله امیری نینگ ایتیشیچه، افغان سنترال هند ساغلیک مرکزیده جراح لیک جهازلری یوق ایدی.
سلاموطندارگه ایتیب کیلگن حجتلردن باشقه بیری نینگ کورسهتیشیچه، بو ایکی قیزنی عملیات قیلگن ذبیحالله مجیدی ناملی داکترنینگ رسمی مکلفیتی بولمهگن. حجتلرگه کوره، بو مرکزده فقط 5 بستری بولگن و جراحلیک بولیمی اوز خودومچه ایجاد بولگن.
قندوز باشقره لاوچیلیک ادراهسیدن بیر منبع نینگ سلاموطندارگه ایتشیچه، ذبیحالله مجیدی باشقرهلاوچیلیک ادارهسی تامانیدن قویباریلگن.
بیراق قندوز باشقرهلاوچیلیک رسمیلری عیبلنگن شخص ضمانت قیلیب قویباریلگن. بو ایکی قیزنینگ ایناغهسی نینگ ایتیشیچه، عایلهسی داکترنی 6 یوزمینگ افغانی آلیب قویباریشگه راضی بولگن.
بوبارهده جراح داکتری ذبیحالله مجیدی و افغان سنترال هند وقتینچهلیک باشلیغی ضیا صافیلردن نظر آلماقچی بولیب کوپلب تلاش قیلدیک، بیراق اولر صحبت بیریشگه حاضر بولمهدی.
بوندن آلدین هم مملکت یشاوچیلری خصوصی ساغلیک مرکزلریده خدمات بولمهگنلیگیدن شکایت قیلگن ایدیلر، اولرنینگ ایتیشلریچه، خصوصی ساغلیک مرکزلری فقط پول تاپیش اوچون ایجاد ایتیلگن.